امریکا وایي له چین سره یې سوداګریز مذاکرات ښه پرمخ روان دي

د امریکا ولسمشر ډونالډ ټرمپ په تازه څرګندونو کې ویلي له چین سره د سوداګرۍ په اړه مذاکرات په سمه توګه مخ ته روان دي او دی هیله لري چې دواړه لوري یوه ګټور توافق ته ورسېږي. دده په خبره دغه توافق به ددواړو لورو په ګټه وي. ټرمپ واک ته له رسېدو سره سم د چین په ګډون له ځینو اروپايي او اسیايي هېوادونو سره سوداګریزه جګړه پيل کړه او د دوی پر شرکتونو او اموالو یې مالیات لوړ کړل. سره له دې چې دې مسئلې امریکا په نړیوالو بازارونو کې تر یوې کچې بې باوره کړه خو ټرمپ دا هر څه لاس ته راوړنه او د امریکا په ګټه کار بولي. چین بیا وایي که د دوی سوداګري اغېزمنه شي نو پر ټوله نړۍ به منفي اغېز وکړي.