د سپینې ماڼۍ یوه جګپوړي چارواکي ويلي، واشنګټن پر ایران د نورو بندیزونو د لګولو په اړه غور کوي.
دغه چارواکي د نوم نه ښودو په شرط ویلي، متحده ایالتونه د ایران له اټومي موافقې د وتلو د کلیزې په درشل کې په پام کې لري، چې پر ایران نوي بندیزونه ولګوي.
دا په داسې حال کې ده، چې ولسمشر ټرمپ د تېر کال په مې میاشت کې له ایران سره د ۲۰۱۵ ز کال له اټومي موافقې څخه د امریکا وتل اعلان کړل او پر دغه هېواد یې د انرژۍ او مالي سکټور په ګډون، په بېلابېلو برخو کې د بندیزونو د بیا لګولو امر وکړ.
دغه تړون متحده ایالتونو، برېټانیا، فرانسې، چین، جرمني او روسیې له ایران سره لاسلیک کړی و.
دغه امریکايي چارواکي ویلي، موږ غواړو بندیزونو ته دوام ورکړو او سوداګر باید په دې باور ولري، چې په اوس وخت کې له ایران سره تجارتي معامله ډېر ناسم فکر دی.
پر تهران د واشنګټن د نویو احتمالي بندیزونو د څرنګوالي په اړه دغه چارواکي نور جزیات نه دي ورکړي، خو دومره یې ویلي چې دغه نوي بندیزونه به په څو اونیو کې ولګول شي.
د ټرمپ ادارې پر تهران د هغو فعالیتونو په خاطر چې هغه یې ورانوونکي بللي، سخت فشارونه راوستي دي او تهران یې په منځني ختیځ کې د سخت دریځو ډلو په ملاتړ، د بالیسټیک توغوندیو او اټومي وسلو په ازمویلو او د سوریې د ولسمشر بشارالاسد په ملاتړ تورن کړی دی.
په ورته وخت کې تهران هم ویلي چې د امریکا بندیزونو په دغه هېواد کې سېلاب ځپلو سیمو ته د مرستو رسولو او ژغورنې پر هڅو ناوړه اغېز ځکه کړی، چې د دغه هېواد هلیکوپټرې له تخنیکي پلوه په بد وضعیت کې دي.
ایران په جنوبي سیمو کې د سختو بارانونو او سېلابونو له امله چې تر اوسه یې د مړو شمېر له ۴۵ کسانو اوښتی، اضطراري حالت اعلان کړی دی.
د ایران د بهرنیو چارو وزیر جواد ظریف په ټوېټ کې لیکلي، چې د امریکا بندیزونو هغو سیمو ته چې وروستیو سېلابونو زیانمنې کړې دي، د ایران د سرې میاشتې ټولنې له خوا د مرستو رسولو هڅې له خنډ سره مخ کړې دي.
ظریف ویلي، د مرستندویو هلیکوپټرو په ګډون، پر تجهیزاتو بندیز لګول اقتصادي جګړه نه، بلکه اقتصادي ترورېزم دی.
