د کندهار د وژل شوي امنیه قوماندان جنرال رازق ورور تادین خان د کورنیو چارو وزارت د لومړي مرستیال پاسوال جانان بارکزي له خوا پرون د کندهار د امنیه قوماندان په توګه معرفي شو.
چارواکي وايي، تادین د کندهار د قومي مشرانو په غوښتنه د ولسمشر د حکم پر اساس د کندهار د امنیه قوماندان په توګه ټاکل شوی دی.
تادین خان که څه هم نظامي زده کړې نه لري، خو ځايي خلک وايي چې په تېرو څو کلونو کې یې له خپل وژل شوي ورور جنرال عبدالرازق سره نږدې همکاري درلوده او د سیمې له حالاتو خبر دی.
جنرال رازق د تېرې پنجشنبې په ورځ د کندهار د والي د يوه ساتونکي له لوري ووژل شو. د ملي امنیت ريیس معصوم ستانکزی وايي، پر جنرال عبدالرازق برید کوونکي له جعلي نوم، جعلي تذکرې او شخصي تضمین سره د کندهار د والي د ساتونکي په توګه دنده پیل کړې وه.
ستانکزي پرون په کندهار کې وویل چې له برید څو دقیقې مخکې بریدګر له کرښې هاغاړه له کوم چا سره پنځه نیمې دقیقې خبرې کړې وې.
د ملي امنیت ريیس په کندهار کې خبریالانو ته وویل، د دې برید په تړاو ۱۵ کسان تر پوښتنو ګروېږنو لاندې دي.
په دوی کې تر ټولو مهم سړی د والي د ګارډ مشر مولاداد دی چې بریدګر ته یې د والي په ساتونکو کې ځای ورکړی و.
ویل کېږي هغه کس چې د دغه سړي تضمین یې کړی د برید په ورځ پاکستان ته تښتېدلی دی.
د کندهار امنیه قوماندان د ولایت په دفتر کې په داسې حال کې چې د ناټو د قاطع ملاتړ د قوماندان سکاټ مېلر او نورو چارواکو سره له یوې امنیتي غونډې څخه د وتلو په حال کې و، د یو ساتونکي له خوا په ډزو سره ووژل شو.
