د هلمند زرګونه کورنۍ د طالبانو د بریدونو له امله د خپلو مېنو پرېښودو ته اړ شوې دي او لا هم په دغه ولایت کې خلک په وېره او اندېښنه کې ژوند کوي. له تېرو څو ورځو راهیسې د هلمند د مرکز لښکرګاه شاوخوا امنیتي وضعیت سخت خراب دی، طالبانو پر مرکز برید کړی دی او د دغه ښار څلورمه امنیتي حوزه د دوی په لاس کې ده. له مرکز کابله هم د دغه جګړې د کابو کولو لپاره تازه دمي سرتېري تللي دي؛ خو په خبره یې، د ملکیانو د خوندیتوب لپاره یې عملیات ورو روان دي. بلخوا ناټو او امریکایي لوري هم د طالبانو دغه برید غندلی دی او د امریکا هوایي ځواکونه د افغان پوځ ملاتړ ته ورغلي دي.
وسله والو له څو ورځو راهیسې د هلمند د مرکز لښکرګاه شاوخوا نا امنه کړې وه، تر دې چې وړمه ورځ یې په مرکز کې پر څلورمه امنیتي حوزه برید وکړ. دغه حوزه یې ونیوله او خپلو جګړو ته یې ادامه ورکړه. له دې سره جوخت افغان ځواکونو هم د دې جګړې د کنټرول لپاره پر بریدونو او عملیاتو لاس پورې کړ. له کندهاره او مرکز هم هلمند ته تازه دمي سرتېري ورسېدل او پرون ناټو ځواکونو هم پر طالبانو هوایي بریدونه کړي دي. د هلمند ځایي چارواکي وایي چې په عملیاتو کې یې تر ۱۷۰ پورې طالبان وژلي دي، خو افغان سرتېرو ته د اوښتو تلفاتو په اړه یې څه نه دي ویلي.
بلخوا په مرکز لښکرګاه کې مېشت خبریالان وایي چې په تېرو ورځو کې نږدې ۴۵۰۰ کورنۍ د دغه ښار په بېلو ځایونو کې د جګړو له وېرې د خپلو مېنو پرېښودو ته اړ شوې دي. د دوی په خبره، هلمندي وګړو خپلې کډې په موټرونو کې بار کړې دي او په ښار کې د ځای ځایګي د پیدا کولو په لټه کې دي. دوی د دغو کورنیو لپاره د بېړنۍ مرستې غوښتنه کړې ده.
ولسمشر غني بیا د هلمند له والي سره په ټلیفوني خبرو کې ویلي چې طالبان به د دغه برید ستره بیه پرې کړي. د هلمند والي پر خپله رسمي فیسبوکپاڼه لیکلي چې ولسمشر غني ورسره ټلیفوني خبرې کړې دي او هلمند ته یې د تازه مرستو د لېږلو ژمنه کړې. غني ويلي: ((طالبانو ته پکار ده چې تاوتریخوالی کم کړي، دوی ته به پر هلمند برید ډېر ګران تمام شي)).
بلخوا په افغانستان کې د امریکايي او ناټو ځواکونو عمومي قومندان جنرال سکاټ مېلر پر مرکز لښکرګاه د طالبانو برید د دوحې د هوکړې خلاف عمل بللی دی. نوموړي په خپلو تازه څرګندونو کې ویلي چې طالبان دې ارو مرو تاوتریخوالی کم کړي، جګړې دې ودروي او د هوکړې خلاف دې خپلو جګړو ته شدت نه ورکوي. هغه ټينګار کړی چې دواړې خواوې باید د دوحې هوکړه عملي کړي. په افغانستان کې د امریکايي ځواکونو ویاند هم ویلي چې دوی د افغان ځواکونو په ملاتړ په هلمند کې پر طالبانو بریدونه کړي دي. د هغه په خبره، امریکايي ځواکونه په هغو سیمو کې د افغان ځواکونو د ملاتړ حق لري، چې طالبانو په هغه سیمه کې د دوحې هوکړه نقض کړې وي.
کورنیو چارو وزارت او د ولسمشر ویاند بیا ویلي چې افغان ځواکونه په هلمند کې پیاوړي دي او طالبانو ته یې درانه تلفات اړولي. د ولسمشر د ویاند صدیق صدیقي په خبره، ډېر ژر به دغه ډله په هلمند کې ماته شي.
ځینې راپورونه وایي چې په هلمند کې له ځینو سیمو افغان سرتېري د طالبانو له لوري ایستل شوي او یا نیول شوي؛ خو افغان حکومت وایي چې دوی شاتګ کړی دی. په هلمند کې خپاره شوي انځورونه ښيي چې د افغان ځواکونو پاتې شوي نظامي تاسیسات د خلکو له لوري چور او نړول کېږي. له دې سره د هلمند برېښنا رياست وايي چې وسله والو طالبانو د برېښنا سب سټېشن ١٥ ساتونکي او دوه فني کارکوونکي له ځان سره بېولي دي. دوی همدا راز وایي چې طالبانو د سب سټېشن توکو ته اور ورته کړی دی او تخنیکي وسایل یې له منځه وړي دي. طالب ویاند بیا دا ادعا رد کړې ده.
