ديپلومات نشریه: هند په افغانستان کې د خپلو تګلارو په اړه بیا کتنې ته اړتیا لري

ديپلومات نشریه په یوه اوږده مقاله کې لیکي د افغانستان امنیت د هند لپاره خورا مهم دی، ځکه که افغانستان نا امنه وي نو هند له دې آدرسه زیانمنېدلی شي. د نشریې به باور که افغانستان کې امنیتي ګډوډي راځي نو ترهګرې ډلې به پياوړې کېږي او دا مسئله به ددې سبب شي چې په هند کې نا امني پيل شي او له دې ترهګرو ډلو پاکستان د خپلو اهدافو لپاره ګټه پورته کړي. نشریه وړاندې لیکي بل پلو هند په افغانستان کې د پاکستان له نفوذ هم وېره لري ځکه افغانستان یوازینی ځای دی چې په مرسته یې هند کولی شي خپله سوداګري منځنۍ اسیا او اروپا ته وغځوي. ديپلوماټ نشریه لیکي هندي حکومت اړ دی چې پر خپلو تګلارو له سره کتنه وکړي او په دې توګه په دغه کتنو کې پر لا ډېرو اقداماتو لاس پورې کړي. د سرچینې په خبره هند دې د ترهګرۍ ضد مبارزې کې د افغانستان ملاتړ وکړي او په دې توګه دې د ترهرګرو پر وړاندې اقدامات ډېر کړي. هند همدا راز کولی شي چې د بشري مرستو او بنسټیزو پروژو په پيل کې په افغانستان کې د ثبات په راتګ کې مرسته وکړي، ځکه د ديپلومات په وینا د افغانستان په ثبات، سوله او امنیت کې نه یوازې سیمه بلکې هند خورا ګټې کولی شي.