د امنیت شورا سلاکار: د اماراتو خبرې مثبتې وې، سوله نږدې ده

د افغان حکومت د ملي امنیت شورا سلاکار حمد الله محب کابل ته را رسېدلی دی او وايي چې په اماراتو کې خبرې هیله بښونکې دي او افغانستان ته سوله راتلونکې ده. حمد الله محب چې پرون یې د اماراتو په څلور اړخیزه غونډه کې ګډون کړی و، له زلمي خلیلزاد سره یې د افغان سولې پر مهمو اړخونو خبرې کړې دي. نوموړي په یوه ټوېټ کې لیکلي دي، چې په اماراتو کې یې خبرې هیله بښونکې وې او افغانستان ته له اوږدې مودې وروسته سوله راتلونکې ده. هغه له امریکا، متحده عربي اماراتو او سعودي عربستان مننه کړې ده چې د افغان سولې په برخه کې هڅې کوي. د حمدالله محب په مشرۍ یو پلاوی پرون امارات کې و او هلته یې له زلمی خلیلزاد، پاکستاني، اماراتي او عرب استازو سره کتلي دي. طالبانو ویلي چې له دغه پلاوي سره نه ګوري. محب کابل ته راستون شوی دی، خو د سلام رحیمي په مشرۍ یو پلاوی لا هم په اماراتو کې دی او د افغان سولې په اړه به د خبرو لپاره هلته حضور ولري.