د اټومي انرژۍ د څار نړیوال سازمان په خپل دری میاشتني راپور کې ویلي، د ایران په یوه نااعلان شوي سایټ کې یې د یورانیمو بېلګې موندلې دي.
دغه سازمان په خپل یوه راپور کې دغه څرګندونې کړې، خو د یاد سایټ په تړاو یې ډېر معلومات نه دي ورکړي.
دا په داسې حال کې ده چې تر دې وړاندې اسرایلو ایران تورن کړی و چې اټومي فعالیتونه یې په یوه نااعلان شوي سایټ کې چې د تهران په څنډو کې په تورقوز اباد سیمه کې دی، پیل کړي دي.
د اټومي انرژۍ د څار نړیوال سازمان په راپور کې دغه راز راغلي چې د ایران د ټیټې سطحې غني شویو یورانیمو زېرمې لاهم د ۲۰۱۵ ز کال اټومي تړون پر خلاف د پرمختګ په حال کې دي.
دغه سازمان تایید کړې چې ایران اوس هم په فوردو اټومي بټۍ کې د یورانیمو د بډاینې چارې پر مخ وړي چې دا کار هم د نړۍ له شپږو قدرتونو سره د اټومي تړون پر خلاف بلل شوی.
بلخوا د بهرنیو چارو او امنیتي پاليسۍ په برخه کې د اروپایي ټولنې لوړپوړې استازې فېدرېکا موګرېني د دوشنبې په ورځ په بروکسل کې د دې ټولنې د بهرنیو چارو وزیرانو تر ناستې وروسته، یوې خبري غونډې ته وویل چې د ایران دا ډول فعالیتونه د اندېښنې وړ دي.
هغې زیاته کړې: «د ایران له لوري وروستی اعلان چې په فوردو بټۍ کې یې د یورانیمو د بډاینې د بیا پیلېدو په اړه کړی، زموږ یوه لویه اندېښنه ده».
د اروپایي ټولنې د بهرنۍ پالیسۍ مشرې او د برېټانیا، فرانسې او جرمني د بهرنیو چارو وزیرانو ویلي چې دوی د ایران له لوري په فوردو اټومي بټۍ کې د یورانیمو د بډاینې د پرېکړې له کبله سخت اندېښمن دي.
دوی په یوې ګډه اعلامیه کې له ایرانه غوښتي چې له ځنډ پرته خپلې ژمنې په بشپړ ډول پر ځای کړي.
دا په داسې حال کې ده چې د اټومي انرژۍ د څار په نړیوال سازمان کې د ایران استازي کاظم غریب ابادي د دوشنبې په ورځ اعلان وکړ چې د ایران د غني شویو یورانیمو کچه تېره اونۍ ۳۷۲،۳ کیلوګرامو ته ورسېده.
د یادونې ده چې وروسته له هغې چې واشنګټن په ۲۰۱۸ ز کال کې د ایران له اټومي تړونه ووت او پر ایران یې نوي اقتصادي بندیزونه ولګول، تهران په تدریج په یاد اټومي تړون کې له خپلو ژمنو په شا شوی دی.
ایراني چارواکي شکایت کوي چې د ۲۰۱۵ ز کال د اټومي تړون پاتې برخه وال، د امریکا متحده ایالتونو د بندیزونو د اغېز په راکمولو کې پاتې راغلي دي.
د دوی په خبره، ټول هغه اقدامات چې ایران له یاد تړونه د ژمنو د ماتولو په برخه کې کړي دي، د بیا راګرځېدو وړ دي.
