د جنرال رازق جنازه په خرقه شریفه کې خاورو ته وسپارل شوه

د رسنیو د راپورونو له مخې د نوموړي د جنازې په مراسمو کې لوړپوړو امنیتي چارواکو ګډون کړی و. له کابل د ملي امنیت رییس معصوم ستانکزي او د سرحدونو چارو وزیر ګل اغا شیرزي په دغه مراسمو کې ګډون کړی و. د کندهار امنیتي چارواکو ویلي چې تر اوسه د پېښې په اړه پوره جزیات له رسنیو سره نه شي شریکولی خو له مرکز ورغلی لوړپوړی پلاوی به هر څه تر پلټنې وروسته له خلکو سره شریک کړي. د کندهار ښار هټۍ او لارې نن تړلې وې او سلګونه کندهاریانو د جنرال رازق د جنازې په مراسمو کې ګډون کړی و. د کندهار ښار امنیت د پولیسو تر څنګ د ځانګړو ځواکونو د دوو کنډکونو له لوري تامین شوی و. بل پلو ولسمشر غني په کابل کې د کندهار د ملي امنیت د رییس د جنازې په مراسمو کې د یادو دواړو چارواکو وژل کېدل ستره ضایعه بللې ده. ولسمشر غني وویل چې د هېواد قسم خوړلي دښمنان په دې توګه افغانان نه شي کمزوري کولی او افغان ولس به ماتې و نه مني. اجرایه رییس هم وویل، چې حکومت به د پېښې ټول اړخونه څېړي او ددغه پېښې عاملین به ژر تر ژره پېژني او د قانون منګولو ته به یې سپاري.