د سولې عالي شورا په ترکیب او کاري ساحه کې تغییرات، چې ولسمشر غني یې د جنیوا په کنفرانس کې هم یادونه کړې وه، د دې شورا د رییس کریم خلیلي صلاحیتونه او د سولې په بهیر کې رول او مشارکت نور هم محدودوي او ښایي نوموړی له خپلې دندې استعفا وکړي.
ولسمشر غني په یوه تازه اقدام کې د کورنیو چارو پخوانی وزیر عمر داودزی د سولې عالي شورا د دارالانشا د نوي رییس په توګه ټاکلی او په پام کې ده چې د دې شورا کاري ساحه هم د سولې په بهیر کې د ګډون پرځای، عامه پوهاوي ته راټیټه شي.
د سیاسي چارو شنونکی محمد زبیر شفیقي په دې اړه وايي:« زه فکر کوم چې استاد خلیلي پخوا هم په خپل کار کې ډېر خوشاله نه و، د ولسمشر سلاکار او مهم څوک چې پخوا د دار الانشاء د رییس په حیث انتخاب شوی و، هغه هم پخوا د ده صلاحیتونه محدود کړي وو او اوس چې داودزی هم انتخاب شوی، زه فکر کوم چې خلیلي به نور هم ځان منزوي احساس کړي.»
د سولې عالي شورا د رییس او ولسمشر غني ترمنځ د سولې په خبرو اترو کې د دې شورا له منزوي کېدو وروسته اړیکې ترینګلې شوې او د شورا مشرتابه په دې باور دی چې د دوی د چارو د ټکني کېدو او له طالبانو سره په خبرو کې د نه پرمختګ یو عامل خپله ولسمشر غني دی.
د کریم خلیلي په اړه ویل کېږي چې د سولې شورا د دارالانشا د پخواني رییس اکرم خپلواک په وخت کې هم له دې امله ناراضه و چې ولسمشر له ټولو قضایاوو ګوښه ساتلی و، نو اوس د دې شورا د صلاحیتونو په محدودېدو او د داودزي په ټاکل کېدو سره به نوموړی له خپلې دندې استعفا وکړي.
هڅه مو وکړه چې په دې اړه د ښاغلي خلیلي د دفتر نظر هم واخلو، خو بریالي نه شوو.
د سولې عالي شورا په ترکیب کې د نویو تغییراتو په اړه ویل کېږي چې ولسمشر غني غواړي له دې شورا نه په راتلونکو انتخاباتو کې د ځان په ګټه کار واخلي.
د سولې په شورا کې د نویو تغییراتو په اړه دا څرګندونې داسې مهال دي چې ولسمشر غني له طالبانو سره د خبرو اترو او راتلونکو ولسمشریزو انتخاباتو په درشل کې په پام کې لري د کورنیو چارو او دفاع وزارتونو په مشرۍ کې هم تغییرات راولي.
