۳ کاله مخکې يعنې د ۲۰۱۸ کال د اپريل په ۱۳مه نېټه د چين د دولت رئيس شي جين پينګ د های نان ولايت د ځانکړې اقتصادي سيمې د جوړېدو ۳۰مې کليزې په مناسبت د لمانځنې غونډې ته د وينا په وخت کې اعلان وکړ چې په های نان ټاپوکې د ازادې سوداګرۍ بندر د ازمويښتي سيمې له جوړونې څخه او د چين ځانګړتيا لرونکي ازادي سوداګريز بندر د جوړولو لپاره د های نان ولايت له هڅو څخه ملاتړ کوي. رئيس شي جين پينګ په خپله وينا کې دې ته اشاره وکړه چې په های نان ټاپو کې د ازادې سوداګرۍ د ازمايښتي سيمې د جوړولو په لاره کې دې د نظامونو د نوښت په محور های نان ته د اصلاحاتو لا لوی صلاحيت ورکول شي او د دې سيمې له کوښښونو او اصلاحاتو څخه دې ملاتړ وشي، څو په دې سيمه کې د لا قانونمند، نړيوالو او اسانه خدمتونو سوداګريز چاپيريال او عادلانه، پرانيستی، واحد او لوړ مؤثر بازار رامنځته او جوړ شي.
(( د های نان د ازادې سوداګرې بندر د ابادۍ عمومي پلان )) د ۲۰۲۰ کال د جون په لومړۍ نېټه د چين د کمونېست ګوند مرکزي کمېټې او دولتي شورا له خوا خپور شو چې دا د چين ځانګړتيا لرونکې ازادې سوداګرۍ بندر د جوړولو د رسمي پيل نښه بلل کيږي.
په های نان کې د چين ځانګړتيا لرونکی د ازادې سوداګرۍ بندر جوړول د شي جين پينګ تر طرحې، ترتيباتو او هڅونې لاندې د اصلاحاتو او ورخلاصون يو مهم ګام دی. له تېرو دريو کلونو راهيسې د دغه ازادې سوداګرې بندر د جوړولو په اړه د مهمو تګلارو له جوړېدو او عملي کېدو سره د های نان د هراړخيز ورخلاصون شکل جوړ شوی دی.
د چين د دولتي شورا مطبوعاتي دفتر د اپريل په ۱۲مه نېټه د های نان د ازادې سوداګرۍ بندر د نظامونو د بشپړولو په اړه د معلوماتو ورکولو خبري ناسته تر سره کړه. په دغه ناسته کې د چين د پرمختګ او اصلاحاتو کمېټې مرستيال څونګ ليانګ وويل، له تېرو دريو کلونو راهيسې د های نان د ازادې سوداګرۍ بندر د جوړولو لپاره يو لړ تګلارې جوړې شوي دي. د لومړنۍ شمېرنې له مخې، تر اوسه پورې د اړوندو تګلارو څه باندې ۱۱۰ سندونه خپاره شوي دي او په دې سره د ازادې سوداګرۍ بندر د تګلارو او نظامونو لومړنی چوکاټ تاسيس شوی دی.
های نان ولايت له تېرو دريو کلونو راهيسې د اصلاحاتو او ورخلاصون د پياوړتيا او د ازادې سوداګرۍ بندر د بېلا بېلو تګلارو د عملي کولو لپاره ډېرې هڅې کړې دي او د دغې سيمې د ځانګړو ايکولوژيکو وړتياوو په کارولو سره يې د سيلانيزو چارو، خدمتي چارو او د لوړې او نوې تکنالوژۍ صنعت په شمول بېلا بېلو صنايعو کې د سيالۍ غوره والی خپل کړی دی. پرانيستی های نان د نړيوالو پانګونو د توجې وړ توده سيمه ګرځېدلې ده. په تېرو دريو کلونو کې د های نان له خوا د استعمال شويو بهرنيو پانګو ارزښت ۵ ميليارډه او ۲۷۰ مليونو امريکايي ډالرو ته رسيدلی دی چې دا رقم د تېرو دېرشو کلونو د استعمال شويو بهرنيو پانګو تر نيمې برخې زيات دی. په تېرو دريو کلونو کې د نويو شرکتونو شمېر ۷۶۳ زرو ته رسيدلی دی چې دا رقم د تېرو دېرشو کلونو له عمومي اندازې څخه اوښتی دی. له ۲۰۱۷ کال څخه تر ۲۰۲۰ کال پورې د های نان په ښارونو او علاقه داريو کې او په کليو کې د دايمي اوسېدونکو د کلني عايد د زياتوالي انډول په جلا جلا توګه ۶.۳ سلنه او ۷،۹ سلنه دی.
په راتلونکي کې به د های نان د ازادې سوداګرۍ بندر قانون، د ازادې سوداګرۍ بندر د بهرنيو تجارتي چارو منفي لېست، د مالونو او خدمتونو د سوداګرۍ د ازادو تبادلو او اسنتياوو ۲۸ فقره ييزې تګلارې په شمول نور زيات ګټور تدبيرونه ګام په ګام خپاره شي. موږ دې ته سترګې په لاره يو چې دغه سيمه لا پسې ځلانده او غوړيږي.
