میاشتې کېږي چې په کابل ښار کې وسله والو غلاوو او جنايي جرمونو د وېرې او وحشت تیاره خوره کړې ده. سره له دې چې په لسګونه ځله رسنیو په کابل کې د روانو نا امنیو په اړه راپورونه خپاره کړي، خو حکومتي مسوولین په دې اړه بې پروایي کوي او داسې ښکاري چې فساد او غیر قانوني چلندونه د دې سبب شوي چې نا امني او جنایي جرمونه ډېر شي. تازه کابل ښاریانو په ټولنیزو رسنیو کې د کابل امن نه دی تر نامه لاندې کمپاین پيل کړی او غواړي حکومتي مسوولین یې خپلو دندو ته متوجه کړي.
له میاشتو راهیسې کابل ښاریان له جنایي پېښو او وسله والو غلاوو ځورېږي، خو اوس تازه د دغو پېښو ډېرېدو خلکو ته سختې اندېښنې پیدا کړې دي. په کابل کې نږدې هره کورنۍ له دې درکه زیانمنه شوې او امنیتي مسوولین د ولس غوښتنو ته هېڅ ډول ځواب نه وایي. د کابل امنیه قوماندان تازه ګومارل شوی، خو د هغه په راتګ سره د کابل ښار په امنیتي وضعیت کې هېڅ ډول بدلون نه دی راغلی. د کابل ښار له مرکزي سیمو نیولې تر لرې سیمو او امنیتي حوزو پورې په هره سیمه کې وسله وال غله شته او د خلکو ژوند ته ګواښ متوجه کوي. د کابل ښار په لومړۍ امنیتي حوزه کې د ارګ په څو مترۍ کې هغه ځوان وسله والو غلو وواژه چې تازه له ښوونځي فارغ شوی و او پوهنتون ته په لوړو نومرو بریالی شوی و. د کورنۍ غړي یې وایي چې امنیتي مسوولین په خپلو دندو کې غفلت کوي چې له امله یې هره ورځ د ځوانانو ژوند له خطر سره مخ دی.
د کابل د پنځمې حوزې په مربوطاتو کې د ګڼو امنیتي پېښو تر څنګ د وسله والو غلاوو او جنايي جرمونو پېښې هم ډېرې دي. د کابل ښار په کمپنۍ سیمه کې څلور ورځې وړاندې یو غریبکاره کس هغه مهال د غلو لخوا ووژل شو چې له خپلې مزدورۍ د کور پر لور روان و. د هغه سپن ږیري پلار وویل: ((زوی مې غریبکار و، همدا یوه کس کور ته ډوډۍ راوړه، هېڅ هم ورسره نه وو، غلو وژلی، حکومت یې باید وژونکي ونیسي)).
په کابل کې یوازې دا ستونزه نه ده، هدفي وژنې هم هغه څه دي چې د ښاریانو په تېره بیا د حکومتي مامورینو د ژوند کړۍ یې تنګه کړې ده. پرون د رحمان بابا مېنې په مربوطاتو کې یو امنیتي افسر د خپلو کور په مخکې د وسله والو له لوري ووژل شو. د هغه د کورنۍ غړي وایي چې حکومت یې په وژلو کې ښکېل دی. د وژل شوي افسر محمد یاسین خور وایي: ((څوک یې وژني؟ همدا ډاکټر عبدالله او همدا ډاکټر اشرف غني یې وژني، بل څوک یې کله وژلی شي)).
د کابل د اتمې حوزې اوسېدونکي وایي، په وروستیو دوو میاشتو کې یې په سیمه کې نا امنۍ او جنایي پېښې خورا ډېرې شوې دي. د دې سیمې د اوسېدونکو په وینا، په وروستیو میاشتو کې په هره اونۍ کې د دوو یا دریو ځوانانو جسدونه خاورو ته سپاري. د دوی په خبره، دغه ځوانان یا غلو وژلي او یا هم د هدفي وژنو او جنایي جرمونو قرباني وي. د کابل ښار اوسېدونکی محمد مهدي بیا حکومت بې کفایته بولي او په خبره یې ولسمشر او د کورنیو چارو وزیر خپل مسوولیتونه په سمه توګه نه ترسره کوي. د ده په خبره: ((نه ولسمشر د ولسمشر په څېر دی او نه هم د کورنیو چارو وزیر د وزیر په څېر دی. دوی څه کوي؟ د خلکو امنیت خو نه شي نیولی)).
له دې سره جوت د ولسي جرګې ځینې غړي وایي چې ولسمشر د خلکو وضعیت ویني، د امنیتی ادارو کمزوري ویني، نو ولسمشر د دفاع لپاره څه نه لري. د دوی په خبره: ((دا هر څه ویني، خو د ویلو لپاره څه نه لري، ځکه پټه خوله دی)).
د ولسمشر ویاند صدیق صدیقي بیا وایي، دوی له روان امنیتي وضعیت خبر دي او د امنیتي وضعیت په اړه د خلکو اندېښنې ورته مهمې دي.
بلخوا د په کابل کې د نا امنیو په اوج کې کابل ښاریانو په ټولنیزو رسنیو کې د کابل امن نه دی تر نامه لاندې کمپاین پیل کړی او د روانو غلاوو او جنایتونو په اړه شکایتونه کوي، چې مسوولین یې دندو ته متوجه کړي، خو تر دې دمه دغه کمپاین کوم اغېز نه دی لرلی.
