د ټاکنو خپلواک کمېسيون پرېکړه کړې چې د ولسمشرۍ ټاکنې به د غزني د ولسي جرګې له ټاکنو سره يو ځای د راتلونکي کال د وري پر ۳۱ مه کېږي.
د کمېسیون له خوا د خپرو شویو معلوماتو له مخې، د ولایتي شورا او ولسوالیو شوراګانو ټاکنې به بیا له ولسمشريزو ټاکنو وروسته د وږي پر ۳۰مه د ټول هېواد په کچه ترسره شي.
دا په داسې حال کې ده چې د ټاکنو خپلواک کمېسيون تر دې وړاندې ويلي وو چې حکومت ترې په يو وخت د ټولو ټاکنو د ترسره کولو غوښتنه کړې ده.
د دغه کمېسیون مرستیال ویاند ذبیح سادات ويلي وو، حکومت له کمېسیونه غوښتي چې د ولسمشرۍ، ولایتي او ولسوالیو شوراګانو او دغه راز د غزني د ولسي جرګې ټاکنې په یو ځای ترسره کړي.
سادات زياته کړې وه چې حکومت هرو ټاکنو ته جلا جلا بودجه او امنيت نه شي برابرولی. هغه زیاتوي: «حکومت کمېسیون ته ویلي، څلور واړه انتخابات دې یو ځای ترسره شي او حکومت هر ځلې انتخاباتو ته جلا بودجه نه شي ورکولای او نه یې هم امنیت خوندي کولای شي. کمېسیون کولای شي د حمل په ۳۱مه د جمهوري ریاست انتخابات ترسره کړي، خو مشکله به وي چې دغه څلور واړه انتخابات د حمل په ۳۱مه مدیریت کړای شو».
د ټاکنو خپلواک کمېسیون د ولسمشريزو ټاکنو د ځنډولو طرحه وړمه ورځ له سیاسي ګوندونو، مدني ټولنو او امنیتي بنسټونو سره شریکه کړه. د دې طرحې پر بنسټ ټاکل شوې وه چې ټولې ټاکنې د راتلونکي کال د چنګاښ پر ۲۲مه نېټه وشي.
په همدې حال کې پر ټاکنو د څار بنسټونه وايي چې د ټاکنو خپلواک کمېسيون پر يوه وخت د څلورو ټاکنو د ترسره کولو وړتيا نه لري.
دوی ټينګار کوي چې د وخت کموالی، د کمېسيون کمزوری مديريت، ناامنۍ او د بودجې کمښت هغه ننګونې دي چې له کبله به يې د ټاکنو خپلواک کمېسيون پر يوه وخت څلور واړه ټاکنې ترسره نه کړای شي.
د افغانستان د ازادو او عادلانه ټاکنو د بنسټ یا فیفا اجرایوي ريیس یوسف رشید وايي: «په يو ځای د څلورو ټاکنو ترسره کېدل د انتخاباتو په خپلواک کمېسیون لوی بوج او دا یو ستر مسوولیت دی. کمېسیون د ولسي جرګې ټاکنې ښې مدیریت نه کړې، د کمېسیون رهبري په خپلو کارونو کې پاتې راغلې او څلور واړه ټاکنې په یو ځای نه شي ترسره کولای».
بلخوا د افغانستان د ازادو ټاکنو د روڼتیا د څار بنسټ ريیس حبیب الرحمن ننګ وايي، د حکومت غوښتنه منطقي نه ده او د څلور واړه ټاکنو په یوځای ترسره کول به د ټاکنو روڼتيا ته سخت زیان ورسوي.
