په کابل کې د کاروان پوهنتون په تالار کې د چین مېډیا ګروپ د پښتو څانګې خبریالې غوټۍ د نوي کتاب « غوټۍ کوچنی ټولګی؛ له مصیبتونو څخه د ځان ژغورنې اړین ټکي» د مخکتنې غونډه ترسره شوه. په دې مراسمو کې ګڼ شمېر لیکوالانو، د پوهنتون استادانو، د فرهنګي بنسټونو استازو او ځوانانو ګډون کړی و.
ګډونوالو د غوټۍ هڅې وستایلې او زیاته یې کړه، چې دا ډول علمي او تعلیمي اثار د ماشومانو لپاره نه یوازې د لوست دود پیاوړی کوي، بلکې د ژوند د مهمو مهارتونو په زدهکړه کې هم مرسته کوي.
د پوهنتون استاد قاضي نجیب الله جامع وویل، افغانستان د نړۍ له هغو هېوادونو څخه دی چې د اقلیمي بدلونونو اغېزې پرې ډېرې دي، او د ماشومانو لپاره د دې موضوعاتو په اړه پوهاوی ډېر اړین دی.
د اکسوس کتاب پلورنځي مسوول، صفیالله ناصري، وویل چې «له مصیبتونو څخه د ځان ژغورنې اړین ټکي» د هغو ماشومانو لپاره لیکل شوی، چې غواړي د طبیعي پېښو پر مهال ځان او خپلوان خوندي وساتي.
د یادونې وړ ده، چې غوټۍ تر دې وړاندې هم یو بل کتاب د افغان ماشومانو لپاره لیکلی و، چې په ګڼو ولایتونو کې ماشومانو ته وړیا وېشل شوی و، او له پراخ هرکلی سره مخ شو.
