د چين د کمونېست ګوند د مرکزي کمېټې د سياسي بيورو دايمي غړي او مرستيال صدراعظم دينګ شوي شيانګ د جون په ۲۰مه نېټه د روسيې په سنټ پیټرزبورګ کې د دغه هېواد له ولسمشر ولاديمير پوتين سره وکتل.
دينګ شوي شيانګ په کتنه کې لومړی پوتين ته د چین دولت د رئيس شي جين پينګ نيکې هيلې وړاندې کړې او ويې ويل، چې د شي جين پينګ او پوتين لارښوونو د دوه اړاخيزو همکاريو پياوړتيا او تلپاتې دوستي ډاډمنه کړې او د پرمختګ په لار کې يې له مختلفو ابهاماتو سره د ګډې مبارزې لپاره د ثبات رول لوبولی دی.
دينګ شوي شيانګ وويل، چين هيله لري، چې له روسيې سره متقابل سياسي باور لا ټينګ کړي، د ګټو کمربند مزی کړي، سوداګريزې همکارۍ او پانګونې لا زياتې کړي، د انرژۍ همکارۍ ژورې کړي، د لويو پروژو ابادۍ ته وده ورکړي او يو د بل د پرمختګ او سمسورتيا ملاتړ وکړي.
پوتين د سنټ پیټرزبورګ د ۲۸م نړیوال اقتصادي فورم په پار روسيې ته د دينګ شوي شيانګ د سفر هرکلی وښود او د نوموړي له لارې يې شي جين پينګ نيکې هيلې وړاندې کړې.
پوتين وويل، چې د بهرنيو ستونزو او ننګونو سره سره د روسيې او چين ترمنځ اړيکې په هراړخيزه توګه پياوړې شوې او بې سارې لوړې کچې ته رسېدلې دي. پوتين هيله څرګده کړه، چې له چين سره همکارۍ ژورې کړي او د دواړو هېوادونو او نړۍ د لا ښه راتلونکي د ابادۍ لپاره ګډې هڅې کړي.
