چين د جون په ۱۶مې نېټې د روان کال د تېرو ۵ میاشتو اقتصادي راپور خپور کړی، چې له مخې يې د دغه هېواد د صنعت او بهرنۍ سوداګرۍ په شمول عمده اقتصادي شاخصونه پورته شوي او اقتصادي کړنې يې باثباته پاتې شوې دي.
نړيوالو رسنيو په خپلو ورځنيو راپورونو کې ويلي، د چین اقتصاد يو ځل بیا انعطاف منونکی توان ښودلی او د نړیوال اقتصاد د بیاسمسورتيا لپاره يې نوی حیاتي ځواک برابر کړی دی.
روان کال د چین د ۱۵م پنځه کلن پلان پیلامه ده. د چين اقتصاد د پیچلي نړيوال چاپېریال او د جیوپولیټیکل شخړو پر وړاندې، څنګه ثبات ساتلی او د پرمختګ په لور روان دی؟
د چین د رینمین پوهنتون د اقتصاد پوهنځي پروفیسور وانګ شیاو سونګ پر دې اند دی، د چين اقتصاد د پیچلي نړيوال چاپېریال او د جیوپولیټیکل شخړو پر وړاندې ثبات ساتلی او لاملونه یې د دغه هېواد په دقیقو او مناسبو پالیسيو او توليدي چارو پسې تړاو لري.
نوموړي ويلي، د چین حکومت خپلې دقیقې پالیسۍ پلې کوي او د بېلا بېلو سکټورونو کارکوونکي يې ښه کارونه ترسره کوي، چې په نتيجه کې يې د دغه هېواد د باکيفیته تولیدي ځواکونو پرمختګ ګړندی شوی او د اقتصادي ودې لپاره يې ډېر خوځنده ځواک برابر شوی دی.
د وانګ شیاو سونګ په اند، د چین اقتصاد داخلي پياوړی بنسټ، قوي انعطاف او پټ ځواک لري.
په یاد راپور کې ثبات، نوښت او انعطاف ۳ مهم ټکي ياد شوي دي.
د روان کال په لومړيو ۵ میاشتو کې، د چين باکیفیته تولیدي چارو په صنعتي ودې کې اصلي رول لوبولی
د روان کال په تېرو ۵ میاشتو کې د چین د لويې پيمانې صنعتي چارو اضافي ارزښت د تېر کال د همدې مودې په پرتله ۵ اعشاریه ۴ سلنه زیات شوی او په ورته وخت کې بیا، د بنسټیزو تاسیساتو پانګونې يې په همدې مودې کې وده کړې ده.
د چین ثابت اقتصاد نړۍ ته د اوږدمهاله پرمختګ ثبات برابروي.
په چین کې باکیفیته تولیدي چارې په چټکۍ پرمختګ کوي.
د روان کال په تېرو پنځو مياشتو( جنورۍ تر مې) کې د چين د لوړې ټېکنالوژۍ تولید په صنعتي وده کې نږدې ۴۰ سلنه ونډه او د تجهیزاتو تولید يې پکې نږدې ۶۰ سلنه ونډه درلوده.
د امریکا د میډټرونیک شرکت مرستیال مشر الیکس ګو رسنيو سره په خبرو کې ويلي، چین د دوی د شرکت لپاره یوازینی بازار دی، چې ۲ نوښتي مرکزونه او د پانګونې د فنډونو بازار لري.
نوموړي چین د خپل شرکت د سوداګرۍ د ودې لپاره نه یوازې یو مهم انجن بللی، بلکې د راتلونکي د نوښت اصلي سرچینه يې هم بللې ده.
