د چین د کمونېست ګوند د مرکزي کمېټې عمومي منشي او دولت رئیس شي جين پينګ او د کيوبا د کمونېست ګوند د مرکزي کمېټې لومړي منشي او دولت رئیس دياز کانيل د سپتمبر په ۲۸ مه د دواړو هېوادونو ترمنځ د اړيکو د ټينګېدو د ۶۵ مې کلیزې په مناسبت يو بل ته د مبارکۍ پيغامونه واستول.
شي جین پينګ په خپل پيغام کې وويل، چې چين او کيوبا له تېرو ۶۵ کلونو راهیسې خپلمنځي اړيکو ته مسلسل او ژور پرمختګ ورکړی او د سوسیالیستي هېوادونو ترمنځ د یووالي او همکارۍ او د پرمختيايي هېوادونو ترمنځ د صادقانه متقابلو مرستو په برخو کې ښه مثال ګرځېدلي دي.
شي جين پينګ وويل: زه د چين او کيوبا ترمنځ اړيکو ته په ډېره درنه سترګه ګورم او غواړم چې له تاسو سره ګډې هڅې وکړم، د دواړو هېوادونو ترمنځ د اړيکو ۶۵ مه کليزه نوې پيلامه وبولو، خپلمنځي لرغونۍ دوستۍ ته دوام ورکړو، د لوړې سويې سياسي اعتماد ژور کړو، په سيستماتيکه توګه خپلمنځي پرمختيايي همکارۍ پرمخ يوسو، هراړخيزې ستراتېژيکې همکارۍ تقويه کړو، نړيوال عدالت او انصاف وساتم او د چين او کيوبا د ګډ برخليک ټولنې په جوړولو کې نوي پرمختګونه ومومو.
دياز کانيل شي جين پينګ ته د مبارکۍ پيغام د کيوبا د انقلاب له رهبر جنرال راول کاسترو روز سره په ګډه واستاوه. نوموړو په دې پيغام کې وويل: د کيوبا او چين ترمنځ اړيکې له تېرو ۶۰ کلونو راهیسې له تاريخي ازموينو وتلې او په پرله پسې توګه يې پرمختګ کړی دی. کيوبا د يوه چين پېژندنې پر اصل ټينګار لري، د چين په کورنيو چارو کې د نورو هېوادونو له مداخلې سره مخالفت کوي، د کيوبا او چين د ګډ برخليک ټولنې ابادۍ ته ژمن دی او له تسلط غوښتنې سره مخالفت کوي.
