زابل؛ په تېرو ۵ میاشتو کې ۳۵ زره کسانو ته د کار زمینه برابره شوې

د زابل ولایت د اقتصاد ریاست مسوولینو ویلي، چې د کورنیو او بهرنیو موسسو په مرسته د دغه ولایت په مرکز قلات ښار او ولسوالیو کې په بېلابېلو رغنیزو پروژو کې د تېرو ۵ میاشتو په موده کې ۳۵ زره کسانو ته د کار زمینه برابره شوې ده. د مسوولینو په خبره یاد کسان د سړکونو، کاریزونو، کانالونو او چکډېمونو د جوړېدو په کارونو بوخت دي او په بدل کې یې د موسسو له لوري نقدي پیسې ترلاسه کوي. سرچینې ویلي، چې دغه کار د خلکو په اقتصادي ژوند کې مثبت بدلون راوستی دی. سرچینې زیاته کړې، چې په دغو پروژو کې ۹۶ زره ټنه خوراکي توکي هم پر ۶۵۰۰ کسانو ویشل شوي او تر څنګ یې پر ځینو کورنیو ۲۲ میلیونه افغانۍ نغدې پیسې هم وېشل شوې دي.