سبا د هېواد په ۳۳ ولایتونو کې د پولیو واکسین کمپاین پیلېږي

سبا د هېواد په ۳۳ ولایتونو کې ماشومانو ته د پولیو یا ګوزڼ ضد واکسین ورکولو کمپاین پیلیږي.ود پولیو فري افغانستان په نوم بنسټ په خپل ویبسایټ کې نن خبر ورکړی، چې تر راروانې پنجشنبې به دغه کمپاین له اروزګان ولایت پرته په نورو ولایتونو کې عملي کېږي. دغه بنسټ چې د ملګرو ملتونو بېلابېلې ادارې یې ملاتړ کوي، له افغان کورنیو غوښتنه کړې خپل هغه ماشومان چې عمرونه یې تر پنځو کلونو کم دي، د ګوزڼ په وړاندې واکسین کړي. دا چې په اروزګان کې ولې دغه کمپاین نه عملي کېږي، وضاحت نه دی ورکړل شوی. په دې تازه کمپاین کې ماشومانو ته A ویټامین هم ورکول کېږي. روان کال په افغانستان کې د ګوزڼ پنځه مثبتې پېښې شوي، چې ټولې په ننګرهار ولایت کې دي.