طالبان: حکومت ته؛ بله بهانه نه ده ورپاتې اوس پر لویه جرګه وخت ضایع کوي

وروسته تر هغه چې افغان حکومت وویل طالبان سولې ته اراده نه لري، یادې ډلې خپل دریځ د اوونۍ تبصرې تر عنوان لاندې خپور کړی دی. تبصره کې ادعا شوې ده چې دوی د بین الافغاني مذاکراتو پیل او د مسئلې د سوله ییز حل لپاره په پوره صداقت ګامونه پورته کړي دي خو افغان حکومت یې تورن کړی دی چې د نویو پلمو او بهانو په تراشلو سره دغه بهیر ټکنی کوي. طالبانو څرګنده کړې، دوی یو اړخیز اوربند اعلان کړ او دغه راز یې د ښه نیت په موخه تر زر تنه ډېر حکومتي بندیان خوشې کړل خو ولسمشر غني بیا د لوی اختر په مناسبت خپله وینا کې یو ځل بیا د تعهد شویو څلور سوه طالب زندانیانو پر نه خوشې کېدو ټنیګار وکړ او زیاته یې کړه چې د دې موضوع وروستي کېدو لپاره به لویه جرګه راوبولي. تبصره کې راغلي، ارګ چې د سیاسي موضع ګیري لپاره منطقي سوژه نه لري اوس هڅه کوي څو ورځې د لویې جرګې د جوړولو پر موضوع عامه اذهان مشغول او د بین الافغاني مذاکراتو پروسه وځنډوي.