د ملي يووالي حکومت اجرائیه رييس عبدالله عبدالله وایي، د کندهار د امنیه قومندان جنرال عبدالرازق په وژنه کې ناټو لاس نه لري.
په سوېل کې دغه ځواکمن قوماندان او د کندهار د امنیت مشر جنرال مومن حسين خېل تېره پنجشنبه د کندهار د والي په دفتر کې د ناټو له لوی قوماندان سره تر غونډې وروسته ووژل شول.
ویل کېږي چې د والي یوه ساتونکي جنرال رازق هغه مهال وواژه چې تر غونډې وروسته سکاټ مېلر الوتکې ته پورته کېده.
د نوموړي تر وژل کېدو وروسته وسله والو طالبانو د یوې خبرپاڼې په خپرولو سره وویل چې د بريد موخه يې جنرال رازق و.
وروسته يې بيا خپله خبرپاڼه بدله کړه او ویې ویل چې موخه یې د رازق او سکاټ مېلر وژل وه.
له هغه راهیسې په خواله رسنیو کې پوښتل کېږي چې د جنرال رازق پر ځای ولې د ناټو لوی قوماندان سکاټ مېلر نه وژل کېده.
اجرائیه رييس وايي چې ناټو د جنرال رازق په وژلو کې لاس نه لري. هغه زیاتوي: «دا ګنګوسه چې پرېکنده ملاتړ دا کار کړی زما په اند د دښمن ژرندې ته اوبه ورکول دي.»
اجرائیه رييس د کوم چا د نوم له اخیستو پرته وویل: «هغوی چې د طالب ملاتړ کوي، هغه که په هر هېواد کې وي چې طالب ته پنا ورکوي یا طالب توجیه کوي او هغوی چې د افغانستان په خاوره کې د طالب جنایت توجیه کوي، هغه د افغانانو دښمنان دي، د جنرال رازق دښمنان دي، د هغه د کورنۍ دښمنان او د ټول افغانستان دښمنان هم دي.»
عبدالله د وزیرانو شورا په ناسته کې جنرال رازق پیاوړی قوماندان وباله او ویې ویل چې له رازق سره هر افغان توکم خواخوږي ښودلې ده.
په خواله رسنیو کې له جنرال رازق سره پراخه خواخوږي ښودل شوې او هغه یې د افغانستان اتل بللی دی.
د یکشنبې په ورځ په کندهار کې ځینې ښځې هم واټونو ته را وتلې وې او له افغان حکومته یې غوښتل چې د جنرال رازق وژونکي په سزا ورسوي.
