د پاکستان د بهرنیو چارو وزیر شاه محمود قریشي ویلي، هند پر پاکستان د بل برید پلان جوړوي. نوموړي پر نړیوالې ټولنې غږ کړی، چې د هند د دغه برید د مخنیوي لپاره دې لاس پکار شي.
نوموړي ویلي، موږ کره استخباراتي معلومات لرو چې هند د اپرېل له ۱۶مې تر ۲۰مې یو وار بیا پر پاکستان د برید پلان لري. قریشي ټینګار کړی چې که چېرې دغه هېواد پر پاکستان برید وکړي، نو دا به د سیمې د ثبات او امنیت لپاره ناوړه پایلې ولري. قریشي دغه څرګندونې تېره ورځ په ملتان کې یوې خبري غونډې ته د وینا پرمهال کړې دي.
هغه ویلي، هندوستان په هندي کشمیر کې د پلوامې برید په اړه د یوې بلې لوبې پلان جوړوي، چې په پایله کې به یې پر پاکستان سفارتي فشار او د پوځي اقدام بهانه ولټوي.
قریشي زیاته کړې: «له موږ سره دا مهال کره استخباراتي معلومات دي، چې هند یو نوی پلان جوړوي او پر پاکستان د یوه بل برید امکان دی او زموږ د معلوماتو له مخې، دا برید د روانې اپرېل له ۱۶مې تر ۲۰مې نېټې پورې امکان لري. که چېرې داسې کېږي، نو دا به دې سیمې پر امنیت او ثبات ناوړه اغېز وکړي».
قریشي زیاته کړې چې د پاکستان د بهرنیو چارو وزارت د دغو کره معلوماتو پر بنسټ، د امنیت شورا غړي دغه وزارت ته وربللي وو او خپلې اندېښنې یې ورسره شریکې کړې دي.
نوموړي زیاته کړې: «موږ غواړو چې نړیواله ټولنه د دغه غیر مسوولانه چلند مخنیوی وکړي او پر هغوی دې فشار راوړي چې پر دې لار لاړ نه شي».
د پاکستان د بهرنیو چارو وزیر په داسې حال کې پر پاکستان د هند د احتمالي برید خبرداری ورکوي، چې هند په تېرې فبرورۍ میاشت کې په پاکستان کې دننه د وسله والو ترهګرو پر یوه مرکز د هوايي برید او ډېرو ترهګرو د وژلو ادعا وکړه، خو پاکستان دا ادعا رد او بې بنسټه وبلله.
د هند او پاکستان ترمنځ دغه کړکېچ تر هغې وروسته رامنځته شو، چې د فبرورۍ په میاشت کې د هندي کشمیر په پلوامه سیمه کې د هندي ځواکونو پر یوه کاروان موټر بم ځانمرګی برید وشو، چې په نتیجه کې یې تر ۵۰ زیات هندي سرتېري ووژل شول او لسګونه نور ټپیان شول.
د دغه خونړي برید مسوولیت پاکستان مېشتې وسله والې ډلې جیش محمد ومانه، چې بیا وروسته هند پرې تور ولګاوه چې دغه برید په پاکستان کې پلان شوی و او له پاکستانه یې وغوښتل چې د دې ډلې پر وړاندې جدي ګامونه پورته کړي.
د یادونې ده چې د پاکستان او هند ترمنځ د رامنځته شوي وروستي کړکېچ له امله، دې دواړو هېوادونو سرتېري په کشمیر کې له ګډې پولې پر یو بل ډزې کوي چې په نتیجه کې یې د پاکستاني رسنیو د راپورونو له مخې، د دواړو هېوادونو پوځیانو او پر پوله مېشتو ملکي وګړو ته مرګ ژوبله اوړي.
