له زابل څخه سږ کال شاوخوا ۷۰۰ ټنه کشته ترکیې ته صادره شوې

د زابل ولایت د صنعت او سوداګرۍ ریاست مسوولین وايي، چې سږ کال د دغه ولایت شاوخوا ۷۰۰ ټنه اشتغ او کشته ترکیې ته صادره شوې ده. سرچینې ویلي، چې دغه راز د نورو وچو مېوو د راټولولو او بسته بندۍ لړۍ هم روانه ده .د زابل د صنعت او سوداګرۍ ریاست مسوولین زیاتوي، چې د واګه بندر له تړل کېدو وروسته، حکومت هڅه کوي د بدیلو لارو له لارې صادرات بهرنیو هېوادونو ته انتقال کړي. د مسوولینو په خبره د زابل وچه مېوه د کیفیت له پلوه ځانګړی بازار لري او د بسته بندۍ، پروسس او صادراتو له لارې به د دې ولایت اقتصادي وضعیت نور هم پیاوړی شي. د زابل د وچې مېوې د اتحادیې مسوولین وايي، که د بهرنیو هېوادونو سره د لارو د خلاصون او ویزو ستونزې حل شي، د وچې مېوې بازار به لا نوره هم پراختیا ومومي.