د چين د اکمالاتي ځنځير درېيم نړیوال نندارتون د جولای په ۱۶مې نېټې په پلازمېنې بېجينګ کې پرانيستل شو، چې د همدې میاشتې تر شلمې نېټې پورې به دوام ولري. په دې نندارتون کې سلګونه کورنیو او بهرنیو تصدیو او یو شمېر نړیوالو سازمانونو او د سيمه ييزو همکاریو ارګانونو ګډون کړی، چې د نړۍ پام یې ځان ته اړولی دی.
د افغانستان د چاپېريال ساتنې ملي ادارې چارواکي ذبیح الله پادشاه دغه نندارتون ته ډېر پام اړولی او له سي جي ټي اېن سره يې په خبرو کې هيله ښودلې، چې افغانستان هم د چين له دغه نندارتون څخه برخمن شي.
د چين د اکمالاتي ځنځير درېيم نړیوال نندارتون له نړۍ سره د وصل او د روښانه راتلونکي د برابرولو په سرلیک ترسره کيږي او د مخکښو تولیداتو د توليد، ځيرکو موټرو، زرغونې کرنې، پاکې انرژۍ، ډيجيټلي ساينس او تخنيک، روغتيا، ژوند او د اکمالاتي ځنځيرونو د خدمتونو په شمول پر اوو برخو ويشل شوی او د نړۍ د صنعتي ځنځيرونو په همکاريو کې نوې لاسته راوړنې او تجربې منعکسوي.
ښاغلي ذبیح الله پادشاه ويلي، د چين د اکمالاتي ځنځير درېيم نړيوال نندارتون څو اړخیز ارزښت لري.
۱. د چين د اکمالاتي ځنځير درېيم نړیوال نندارتون د دغه هېواد له حکومت سره د نړیوالو اړیکو او اقتصادي پراختیا لپاره ګټور دی.
۲. د دغه نندارتون ارزښت ته په کتو، دا ځل په دغه نندارتون کې لوېدیځو کمپنيو هم خپل توکي او محصولات نندارې ته وړاندې کړي، چې دا تر ټولو ډېر د پاملرنې وړ ټکی دی.
۳. دغه نندارتون د هغو شرکتونو لپاره، چې د مصنوعي ځیرکتیا، پاکې انرژۍ او ځیرکو موټرونو په برخه کې کار او پانګونې کوي، ډېر ارزښت لري. دغه نندارتون نه يوازې د دغو شرکتونو د توليداتو د ښودلو لپاره ښه فرصت دی، بلکې د دوی لپاره د نظريو د تبادلو او همکاريو يو ډګر هم دی.
د چين د اکمالاتي ځنځير درېيم نړیوال نندارتون کې د پاکې انرژۍ، کرنې، ماشينونو، ليتیم بېټريو، د نفتو د استخراج او مخکښو توليداتو د توليد په برخو کې بېلا بېل ځنځيرونه نندارچيانو ته وړاندې کوي.
ذبیح الله پادشاه په دې اند دی، چې افغانستان باید تر ډېره پر پاکې انرژۍ او کرنې تمرکز ولري، ځکه زراعت د خواړو او پاکه انرژي بیا د چاپېریال ساتنې اساسي او بنسټیز اصل دی او دواړه برخې د تلپاتې پرمختګ لپاره خورا اړینې دي.
افغانستان کې څلور کاله کېږي، چې جګړه درېدلې او اوس په دغه هېواد کې د ابادۍ او د خلکو د ژوند د ښه والي لپاره ډېرې هڅې پيل شوې دي، خو له جګړې پاتې ستونزې ژر نه شي لرې کيداې او د بيارغونې کارونو ته ډېره اړتيا ليدل کېږي.
د ښاغلي ذبیح الله پادشاه په اند، د نندارتون بشپړ اکمالاتي ځنځيرونه د بيارغونې او پرمختګ لپاره مرسته برابرولی شي. هغه وويل:
((د دغه نندارتون د نوښتونو برخه به د پرمختګ او ودې لپاره نوې دروازې پرانیزي او دا يو ډېره ښه فرصت دی او بازار ته به پرمختللې ټکنالوژي وړاندې کړي، پانګونې ته به فرصتونه برابر کړي او په مهمو برخو لکه کرنې او پاکې انرژۍ کې به نوي بدلونونه راولي. دغه نندارتون او نوښتونه يې د افغانستان لپاره د روښانه راتلونکي زیری دی. زه باوري یم، چې په چین کې دغه ډول نندارتونونه کولای شي د افغانستان د بیارغونې او ابادۍ په برخه کې مهم رول ولوبوي، ځکه دغسې نندارتونونه نورو ته نوې ټکنالوژي، پانګونه او نړیوالې تجربې ورپېژني. که افغان حکومت، شرکتونه او سوداګر پکې فعاله برخه واخلي، نو دا به د اقتصادي ودې، کرنیز پرمختګ او صنعتي ظرفیت لوړولو لپاره ښه فرصت وي. په دې اساس، زه هیله مند یم، چې افغان لوري په دې نندارتون کې همکاريز فرصتونه پیدا کړي او له دې لارې له نړیوالو شریکانو سره اړیکې پراخې کړي)).
