د امریکا د بهرنیو چارو وزیر ویلي چې په ناټو سازمان کې باید پراخ بدلونونه راوستل شي.
د امریکا د بهرنیو چارو وزیر مایک پامپیو چې د برلېن دېوال د نړېدو په ۳۰مه کلیزه کې یې ګډون کړی و، خبرداری ورکړی چې په نړیواله کچه نویو ګواښونو ته په کتو، په ناټو سازمان کې باید جدي بدلونونه راوستل شي.
هغه ویلي چې چین او روسیه د ناټو لپاره جدي ګواښونه دي، نو اړینه ده چې په دغه سازمان کې د بدلونونو تر څنګ، له دغو ګواښونو سره د مبارزې پر لارو چارو غور وشي.
هغه دغه راز زیاته کړې: «له اویا کلونو وروسته ناټو په جدي توګه بدلونونو او پرمختګونو ته اړتیا لري. اړتیا ده چې د نن ورځې له واقعیتونو ځان خبر کړو، غړي هېوادونه باید د ناټو سازمان د پیاوړتیا لپاره سرچینې نورې هم پراخې کړې، که نه، ناټو به پر یوه بې ګټې سازمان بدله شي».
په ورته وخت کې د ناټو عمومي منشي ینس سټولټنبرګ هم په یاده غونډه کې د ګډون پر مهال ویلي، چې چین او روسیه په اوس وخت کې هڅه کوي چې د ناټو لپاره ستونزې رامنځته کړي. هغه پر خپلو متحدینو او د ناټو پر نورو غړو هېوادونو هم غږ کړی چې په نړیواله کچه شته ګواښونو ته تیاری ونیسي.
سټولټنبرګ ویلي: «د چین او روسیې روانو هڅو او د دفاعي وړتیاوو لوړېدو ته په کتو، د ناټو غړي هېوادونه باید خپل یووالی لا نور هم پیاوړی کړي او په ګډه د روانو ګواښونو د مبارزې لپاره تیاری ولري».
په ورته وخت کې د امریکا د بهرنیو چارو وزیر دغه راز پر روسیې تور لګولی، چې هڅه کوي خپل سیاسي مخالفین وځپي. د هغه په خبره، روسیه په کور دننه او بهر کې د خپلو مخالفینو د ځپلو هڅه کوي چې دغه څه د نوموړي په خبره، له ټولو نړیوالو موازینو او نورمونو سره په ټکر دي.
په ناټو سازمان کې د پراخو بدلونونو د راوستو په تړاو د امریکا دغه څرګندونې داسې مهال دي، چې تر دې وړاندې د فرانسې ولسمشر ایمانویل مکرون هم ویلي وو چې ناټو سازمان پر «مغزي مرګ» اخته شوې، چې په خبره یې، په دغه سازمان کې د امریکا او اروپایي متحدینو ترمنځ هېڅ ډول همغږي نشته.
