مشرانو جرګه وايي، د کابل د ټاکنو د رای شمېرنې په پروسه کې ګڼې ستونزې موجودې دي. د دې جرګې غړي وايي، ځینې کړۍ هڅه کوي چې د کابل ولایت د رای شمېرنې پروسه له کړکېچ سره مخ کړي.
د دې جرګې مشر فضل هادي مسلمیار بیا د سناتورانو له څرګندونو وروسته پر ټاکنیزو کمېسیونونو غږ وکړ چې پاکې او ناپاکې رایې سره جلا او حق حقدار ته وسپاري. نوموړي همدا راز وویل، د کمېسیون کارونه به تر جدي څارنې لاندې ونیسي.
مسلمیار زیاته کړه: «د سناتورانو لهخوا د انتخاباتو په تړاو څرګندونې وشوې، همدارنګه د انتخاباتو په کمېسیون کې ځینې ملاحظې موجودې دي چې دا به د ملي شورا له لوري تعقیب شي».
دا په داسې حال کې ده چې تر دې وړاندې ولسي جرګې او ځینو نورو ادارو هم په ټاکنیزو کمېسیونونو کې د فساد او لاسوهنې په تړاو نیوکې کړې وې.
له دغو نیوکو وروسته د ولسي جرګې په ټاکنو کې د درغلیو او لاسوهنو په تړاو توند غبرګونونه را وپارېدل او دغه غبرګونونه د دې لامل شول چې د ټاکنو خپلواک کمېسیون د هغو مرکزونو په تړاو چې پر وړاندې یې شکایتونه موجود وو، د رایو د بیا شمېرنې پرېکړې ته اړ شي.
خو د ټاکنیزو شکایتونو کمېسیون اوس ویلي چې د ټاکنو د خپلواک کمېسیون یوه پلاوي ورته ډاډ ورکړی چې د کابل په حوزه کې له ناپاکو رایو څخه د پاکو رایو د جلا کېدو لپاره به په بشپړه توګه د ټولو اسنادو د سپارلو بهیر ډېر ژر بشپړ کړي.
د مشرانو جرګې غړي وايي، کمېسیونونه باید د خلکو په پاکو رایو لوبه او سیاسي معامله ونه کړي.
د دې جرګې غړي انجنیر فرهاد سخي وویل: «داسې لاسونه کار کوي چې د کابل انتخابات له لوی کړکېچ سره مخ کړي، کمېسیونونه په خپلو منځو کې اچوي او د خلکو په رایو لوبه کوي او سیاسي معاملې ته لار هواروي».
سناتورانو همدارنګه له ټاکنیزو کمېسیونونو وغوښتل، څو هغه کسان له لېسته لرې کړي چې د درغلیو له لارې یې رایې اخیستې دي.
تر دې مخکې هم ځینو سیاسي ګوندونو ویلي، که کمېسیون پاکې او ناپاکې رایې سره جلا نه کړي، د ټاکنو پایلې ورته د منلو وړ نه دي.
خو د ټاکنو خپلواک کمېسیون وايي، رای شمېرنه د څارونکو په حضور کې ترسره کېږي او کمېسیون ژمن دی چې دا پروسه به په پوره شفافیت مخ ته یوسي.
