د هېواد د ملي امنیت رییس معصوم ستانکزي نن د کندهار د برید په اړه لومړني معلومات له رسنیو سره شریک کړل. هغه په یوه خبري غونډه کې د خبرو پر مهال وویل، چې پر جنرال رازق او نورو امنیتي چارواکو برید کوونکی کس لږ موده وړاندې د افغان پولیسو په لیکو کې دنده اخیستې وه. دده په خبره بریدګر په جعلي نامه او جعلي پېژندپاڼه د پولیسو په لیکو کې شامل کړل شوی دی او تظمین یې هم له امنیتي مراحلو پرته یوه شخص کړی دی. هغه زیاته کړې، بریدګر تر برید پنځلس دقیقې وړاندې په پاکستان کې له یو چا سره خبرې کړې دي. ستانکزی وايي له دې ښکاري چې نوموړي له پولې له هاخوا سیمو امر تر لاسه کاوه او دغه برید هم په پاکستان کې پلان شوی دی. د کندهار امنیه قومندان او ددغه ولایت د ملي امنیت رییس تېره پنجشنبه په یوه ترهګریز برید کې ووژل شول. د کندهار والي هم په برید کې ټپي شو چې دمګړی تر درملنې لاندې دی. د ملي امنیت رییس معصوم ستانکزي ویلي دا د تحقیقاتو لومړنۍ پایلې دي او لا هم ددوی څېړنې نه دي بشپړې شوې او پوره معلومات به وروسته له رسنیو سره شریک کړي.
