نشنل انټرسټ: لوړه سلنه امریکایان له افغانستان د خپلو ځواکونو وتل غواړي

امریکا افغان جګړه نه شي ګټلی او امریکايي وګړي هم د خپلو ځواکونو د جګړې مخالف دي. د یوې نوې نظر پوښتنې له مخې ۵۷ سلنه امریکایان ددې پلویان دي چې ټرمپ خپل ټول ځواکونه له افغانستان وباسي. له دې ډلې یوازې ۶۷ سلنه یې امریکایي نظامیان دي. بل پلو نشنل انټرسټ نشریه په خپله یوه مقاله کې لیکي چې امریکا په افغانستان کې روانه جګړه نه شي ګټلی او اړ هم نه ده چې دغه جګړه وګټي. د سرچینې په وینا امریکا ددې لپاره د افغان جګړې ګټل غواړي چې افغانستان یو ځل بیا د ترهګرو پر امن مرکز بدل نه شي، خو په دې باید سترګې پټې نه شي چې هېڅ ترهګره ډله په افغانستان کې مستقیما امریکا ته ګواښ نه ده. نشنل انټرسټ لیکي طالبان امریکايي ګټو ته ګواښ نه دي نو ځکه واشنګټن ته نه ده په کار چې په افغانستان کې ددغه ډلې پر ضد خپلې جګړې ته ادامه ورکړي. د سرچینې په خبره له همدې امله لوړه سلنه امریکایان په افغانستان کې د خپلو ځواکونو د حضور مخالفین دي او ددغه جګړې د پای ته رسولو غوښتنه کوي.