نن د هېواد په شپږو ولایتونو کې د ګوزڼ واکسین کمپاین پیلېږي

د ماشومانو لپاره د ملګرو ملتونو د ملاتړ صندوق یا یونسېف وايي نن د افغانستان په شپږو ولایتونو کې د ګوزڼ پر ضد د واکسیناسیون څلور ورځنی کمپاین پیلېږي. تېره اونۍ هم په ګڼو ولایتونو کې د ګوزڼ ضد واکسین کمپاین ترسره شو چې څه باندې ۱۱ میلیونه ماشومانو ته پکې واکسین ورکړل شو. سره له دې چې په هېواد کې په بیا بیا د پولیو ضد واکسین کمپاینونه ترسره کېږي، خو د پولیو ویروس بیا هم شته او همدا روان کال یې پنځه مثبتې پېښې ثبتې شوې. د یونسېف چارواکي وايي د ګوزڼ ضد واکسین کولو دا څلور ورځنی کمپاین په بلخ، جوزجان، سمنګان، سرپل، فاریاب او اروزګان ولایتونو کې ترسره کېږي. په پام کې ده چې په دغه کمپاین کې څه باندې یو نیم میلیون ماشومان چې عمرونه یې له پنځو کلونو کم دي،‌ واکسین کړای شي. تېره اونۍ هم د افغانستان بېلابېلو ولایتونو کې د ګوزڼ مخنیوي لپاره د واکسیناسیون کمپاین ترسره او څه باندې ۱۱ میلیونه ماشومان پکې واکسین شول.