نن په امریکا کې د ناټو د بهرنیو چارو وزیرانو غونډه جوړېږي

د ناټو تړون د بهرنیو چارو د وزیرانو دوه ورځنۍ غونډه نن په واشنګټن کې پیلېږي. تمه کېږي چې د دې تړون لوړ پوړي ډیپلوماټان او چارواکي به په دې غونډه کې د ترهګرۍ ضد مبارزې او د افغان کړکېچ د سیاسي هواري لپاره پر روانو هڅو خبرې وکړي. دغه غونډه د ناټو سازمان د ۷۰مې کلیزې په مناسبت جوړه شوې ده. ددغه غونډې کوربه توب د امریکا د بهرنیو چارو وزیر مایک پمپیو کوي. د ناټو د بهرنیو چارو وزیرانو په دې غونډه کې به د روسیې، ترکیې او اوکراین په اړه هم بحثونه وشي. د ناټو عمومي منشي ینس سټولټنبرګ تر دې وړاندې یوې خبري غونډې ته ویلي وو، چې د افغانستان د سولې مسئله ددغه غونډې له مهمو بحثونو ده.