هرات؛ د صادراتي اسنادو د طی مراحل کولو واحد مرکز پرانیستل شوی

د هرات ځایي چارواکي وایي، چې د دغه ولایت د سوداګرۍ خونې د صادراتي اسنادو د طی مراحل کولو واحد مرکز پرون د هرات والي شیخ مولانا اسلام‌جار او د صنعت او سوداګرۍ وزارت د معین مولوي احمدالله زاهد په ګډون پرانیستل شوی. د پرانستې په مراسمو کې د هرات والي ویلي، چې اسلامي امارت د کورنیو تولیداتو د پراختیا او د صادراتو د زیاتوالي لپاره هڅې کوي او هیله لري, چې د دغه مرکز په فعالېدو سره به د هرات د صادراتو کچه نوره هم لوړه شي. د معلوماتو له مخې، یوازې په ۱۴۰۳ کال کې د هرات له لارې ایران، عراق، ازبکستان، تاجکستان، قزاقستان، ترکمنستان، هندستان او ځینو اروپایي هېوادونو ته د ۱۶۴ میلیونه ۸۲۰ زره امریکایي ډالرو په ارزښت توکي صادر شوي دي.