د چين د کمونېست ګوند د مرکزي کمېټې د سياسي بیورو غړي او بهرنيو چارو وزير وانګ يي د جون په لومړۍ نېټې په پلازمېنې بېجینګ کې د برازیل له بهرنیو چارو وزیر ماوري ویرا سره د دواړو هېوادونو د خارجه وزیرانو پنځم جامع ستراتيژيکي ډيالوګ ترسره کړی دی.
وانګ يي ياد ډيالوګ ته په وينا کې ويلي، چې په دې وروستيو کلونو کې، د چین د دولت رئیس شي جين پينګ او د برازیل ولسمشر لویز لولا تر ستراتيژيکي لارښوونې لاندې، د دواړو هېوادونو اړيکو له جامع ستراتيژيکو همکارانو څخه د ګډ برخلیک ټولنې په لوري مهم ګامونه پورته کړي دي.
نوموړي ويلي، دواړه خواوې دې د مشرانو مهمه اجماع پلې کړي، د چين او برازيل د ګډ برخلیک ټولنې جوړونې ته دې دوام ورکړي او په ګډه دې د مختلفو بهرنيو ننګونو پر وړاندې مقاومت وکړي.
وانګ يي ويلي، چين د برازيل د حکومت ستاینه کوي چې له اوږدې مودې راهیسې يې د يو چين پېژندنې پر اصل ټینګار کړی دی او په خبره یې، چین د خپل ملي حاکميت او خپلواکۍ د ساتنې او د پرمختګ د ترلاسه کولو په برخه کې د برازيل ملاتړ کوي.
نوموړي زياته کړې، دواړه هېوادونه دې د مشرانو لخوا د ۲۰۲۶م کال “چین – برازیل کلتوري کال” د بریالیتوب مهمه موافقه پلې کړي او په مختلفو برخو کې دې تبادلو او همکاریو ته وده ورکړي او هم دې د څو اړخیزو میکانیزمونو په چوکاټ کې تبادلې او همکارۍ پیاوړې کړي او په فعاله توګه دې ۴ لوی نړیوال نوښتونه پلي کړي.
ویرا ویلي، برازیل د یو چین پېژندې پر اصل ټینګار لري او هیله یې ښودلې چې له دغه هېواد سره ستراتیژیک متقابل باور او عملي همکارۍ پیاوړې کړي.
نوموړي ويلي، برازیل به له چین سره څو اړخیزې همکارۍ پیاوړې کړي.
