په سوډان کې لاریونکوونکو د دغه هېواد له پوځي مشرانو غوښتي، چې سمدستي دې واک ملکي حکومت ته وسپاري، څو هغه پخوانی ولسمشر عمرالبشیر محاکمه کړي.
دغه غوښتنه د سوډان پروفېشنل اسوسیشن په نوم ټولنې چې د بشیر پر ضد یې وروستي لاریونونه تنظیم کړي وو، کړې ده.
دې ټولنې همدا راز غوښتنه کړې چې دغه انتقالي حکومت او وسله وال ځواکونه به بشیر او د استخباراتو د ملي او امنیتي ادارو ټول رییسان محاکمه کوي.
په زرګونو لاریونکوونکو د سوډان په پلازمېنه خرطوم کې د پوځ د مرکزي قرارګاه په مخ کې، د اعتراض په توګه خیمې درولې چې پر واکمنې پوځي شورا چې له قدرته د عمرالبشیر تر لرې کېدو وروسته یې قدرت په لاس کې اخیستی، خپلو فشارونو ته دوام ورکړي.
د دغو لاریونونو تنظیموونکې ټولنې له خپلو ملاتړو غوښتي، چې خپلو اعتراضونو ته تر هغو دوام ورکړي، څو یې چې ټولنې غوښتنې منل شوې نه وي.
د لاریونوالو د دغو غوښتنو په اړه د پوځي شورا یوه ویاند چې له نورو غړو سره یې په خبري غونډه کې حاضر و، څه نه دي ویلي؛ خو یوازې د استخباراتي ادارې د نوي مشر د ټاکلو اعلان یې کړی دی.
د امریکا متحده ایالتونو، برېټانیا او ناروې وړمه ورځ ویلي، چې د سوډان پوځي چارواکي او نور اړخونه باید یوې ملکي واکمنۍ ته د انتقال پر سر خبرې وکړي.
بلخوا د سوډان د بهرنیو چارو وزارت له نړیوالې ټولنې غوښتي، چې په سوډان کې د ډیموکراټیک انتقال یوه هدف ته په رسېدو کې د واکمنې پوځي شورا ملاتړ وکړي.
دغه راز د یاد هېواد د پوځي شورا نوي مشر، جنرال برهان د تېرې شنبې په ورځ ژمنه کړې، چې د بشیر رژیم به ړنګوي او د شپې له خوا پر ګرځېدو راګرځېدو بندیز به سمدستي لرې کړي.
نوموړي همدا راز ژمنه کړې چې ټول هغه کسان به محاکمه کړي، چې د لاریونکوونکو په وژلو کې لاس لري.
هغه زیاته کړې، ټول هغه معترضین به چې د بشیر د واکمنۍ په وروستیو اونیو کې په هېواد کې د اعلان شوي اضطراري حالت په ترڅ کې نیول شوي، خوشې کړي.
جنرال برهان وروسته له هغې چې جنرال اواد ابن عوف له قدرته د بشیر تر لرې کېدو وروسته په ۲۴ ساعتونو کې د پوځي شورا له مشرۍ استعفا کړې ده، د دې شورا واګې په لاس کې اخیستې ده.
د سعودي عربستان په ګډون، متحده عربي اماراتو هم د انتقالي شورا ملاتړ کړی دی.
سوډان د متحده عربي اماراتو او سعودي عربستان په ګډون، د هغه پوځي ائتلاف غړی دی چې په یمن کې د ایران ملاتړو حوثي یاغیانو پر ضد جګړه مخ ته وړي.
