پښتين افغانانو سره د پاکستان د ناوړه چلند خلاف د پاڅون اعلان وکړ

د پښتون ژغورنې غورځنګ مشر منظور پښتین د ډيورنډ فرضي کرښې په اوږدو او د پاکستان تر واکمنۍ لاندې سیمو کې افغانانو سره د پاکستان د ناوړه چلند خلاف د ولسي پاڅون اعلان وکړ.  نوموړي زياته کړې، چې په چمن، تورخم او انګور اډې دروازو کې د ولسونو ځورونې پر خلاف به پراخ ولسي پاڅون وکړي. پرون د افغانستان پخواني ولسمشر حامد کرزي هم له ملګرو ملتونو او د بشري حقونو له مدافع بنسټونو وغوښتل، چې په پاکستان کې د مېشتو افغان کډوالو حقونو د دفاع لپاره لاس په کار شي. حامد کرزي د پاکستان په سند ایالت کې د شاوخوا ۱۱ سوه افغان کډوالو د بندي کېدو راپور ته په اشارې ویلي، چې د ښځو او ماشومانو په ګډون د دغو افغانانو بندي کيدو خواشينی او اندېښمن کړی دی. له څو ورځو راهيسې په ټولنیزو رسنیو کې افغانانو سره د پاکستاني ځواکونو د ناوړه چلند په اړه ګڼ مستند اسناد خپاره او افغانانو پرې توند غبرګونونه وښودل. د پاکستان حکومت او په افغانستان کې د ا.ا حکومت تر اوسه په دې اړه څه نه دي ويلي.