ایران په لومړي ځل له اوبتله کروز میزاییل توغولی

ایراني رسنۍ وایي چې ایران له هرمز تنګي د کلنیو پوځي تمرینونو پر مهال د لومړي ځل لپاره له یوه اوبتله کروز ډوله میزاییل توغولی دی. د ایرنا خبري اژانس د راپور له مخې دا کروز توغندی نن له غدیر ډوله اوبتل نه په بریالیتوب سره وتوغول شو. د ایرنا په راپور کې هغه واټن نه دی یاد شوی چې دا توغندی یې په نښه کولی شي. دا ازموینه په داسې حال کې کېږي چې د واشنګټن او تهران ترمنځ اړیکې خورا ډېرې ترینګلې شوې دي. د امریکا ولسمشر ډونالډ ټرمپ له ایران سره د امریکا او لویدیځو هېوادونو له اټمي تړونه ځکه ووت چې دده په وینا ددې هېواد د بالستیک توغندیو د پروګرام د محدودولو غوښتنه نه وه پکې شوې. هرمز تنګی د خلیج په خوله کې د تېلو د لېږد مهمه بحري لاره ده.