د چين دولت رئيس شي جين پينګ د سپټمبر د اتمې نېټې په شپه د بريتانيا له لومړي وزير اندي بورنهام سره ټېليفوني خبرې وکړې.
شي جين پينګ په يادو خبرو کې د بريتانيا نوي لومړي وزير اندي بورنهام ته د ماموریت د پیل په پار مبارکي ويلې او دې ته يې اشاره کړې، چې چين او بريتانيا هر اړخيز ستراتيژيک همکاران دي. که څه هم د دواړو هېوادونو ټولنيز نظامونه او وضعيتونه توپير لري، خو د دواړو هېوادونو ګډې ګټې تر توپيرونو زياتې دي. د هغه په خبره، دواړه خواوې بايد يو بل ته درناوی ولري او یو پر بل باور وکړي، له توپيرونو سره سره دې ګډې ګټې پيدا کړي او متقابلې ګټه لرونکې همکارۍ دې نورې پیاوړې کړي.
اندي بورنهام د شي جين پينګ يادې خبرې تایید کړې دي او ويلي يې دي، چې بريتانيا غواړي د دواړو هېوادونو اوږدمهالو او ثابتو ستراتيژيکو همکاريزو اړيکو ته وده ورکړي، له چين سره د لوړې کچې تګ راتګ تر سره کړي، په بېلابېلو برخو کې دوه اړخيزې همکارۍ او کلتوري تبادلې پياوړې کړي، څو دوه اړخيزې اړيکې په تاریخ کې تر ټولو لوړې کچې ته بيا ورسوي او خلکو ته نورې ګټې ورسوي.
د نوموړي په خبره، د تايوان مسئلې په اړه د بريتانيا دريځ بدلون نه لري. اوس نړيوال وضعيت ډېر پېچلی او کړکېچن دی، په داسې حالت کې بايد بريتانيا او چين د امنيت شورا د دايمي غړو مسئوليت پر غاړه واخلي او هڅه دې وکړي، چې د ډيالوګ له لارې نړيوالې تودې مسئلې حل کړي او په ګډه سره د اقليمي بدلون په ګډون نړيوالې ننګونې حل کړي، څو د نړۍ ثبات او سمسورتيا خوندي وساتي.
