د ټرمپ پخوانی وکیل: ټرمپ دروغ ویلو ته اړ کړم، پخپلو کارونو شرمېږم

د امریکا د ولسمشر پخواني وکیل مایکل کوهن کانګرېس ته ویلي، د ۲۰۱۶ کال ولسمشرۍ ټاکنو کې د هېلري کلېنټن د برېښنالیکونو له هېک کېدو ټرمپ خبر و. هغه زیاته کړې، ټرمپ ترې غوښتي وو چې دده په ملاتړ کانګرېس ته هم دروغ ووایم. د ډونالډ ټرمپ وکیل تېره ورځ د کانګرېس استازو ته خبرو کې د داسې بانکي چک د کاپي لرلو ادعا وکړه چې ټرمپ د سټارمي ډانیل د خولې چوپولو لپاره ده ته لاسلیک کړی و. مایکل کوهن تېر ډيسمبر کې له دې امله په درې کاله بند محکوم شو، چې سټارمي ډانیل ته د خولې چوپولو لپاره یې د ټرمپ ټاکنیزو هڅو کې مالي سرغړونه کړې، له مالیې یې تېښته کړې او کانګرېس ته یې درواغ ویلي. کوهن دې ناسته کې له ډونلډ ټرمپ سره په خپله همکارۍ او مرسته پښېماني وښوده. هغه دا هم وویل، چې د ډونلد ټرمپ د ناروا چارو د پټولو له امله شرمېږي. خو ټرمپ په یوه ټوېټ کې پر مایکل کوهن سخته نیوکه کړې او هغه یې د خپل بند د کمولو لپاره په درواغو تورن کړی دی.