حنفي: افغان خاوره به د هېڅ هېواد پر ضد ونه کارول شي

د سرپرست حکومت اداري مرستيال چين ته د خپل سفر په ترڅ کې د چين – سويلي اسيا نهم نړۍوال نندارتون کې چې د ياد هېواد په کونمينګ ښار کې جوړ شوى ګډون کړی. نوموړي د نندارتون ګډونوالو ته په خپلو خبرو کې دغه نندارتون د سيمې هېوادونو ترمنځ د اقتصادي، سیاسي او کلتوري اړيکو ودې لپاره مهم فرصت بللى او د “يو کمربند يوې لارې” پروژې له لارې يې د سيمې اقتصادي وده کې د چين پر رول ټينګار کړى. اداري مرستیال د کانونو، انرژۍ، ټرانزیټ، ټکنالوژي او سوداګرۍ برخو کې له چين او سويلي اسيا هېوادونو سره د افغانستان همکاريو پراختیا ته په اشارې ويلي، د افغانستان جغرافيايي موقعيت کولى شي دغه هېواد د مرکزي، سويلي او ختيځي اسيا ترمنځ په نښلوونکي پل بدل کړي. نوموړي عمومي عفوه،امنیت ټينګښت، نشه يي توکو سره مبارزه او بنسټیزو پروژو پيل د سرپرست حکومت له داخلي لاسته راوړنو بللي په خبره يې، هيڅ ډلې ته اجازه نه ورکوي چې د افغانستان له خاورې نورو ته ګواښ پېښ کړي.