سټيفان: له زلزله ځپلو سره د ګډو مرستو له صندوقه مو ۱۰ میلیونه ډالر ځانګړي کړي

د ملګرو ملتونو د همغږۍ دفتر (اوچا) د ګډو مرستو له صندوقه ۱۰ میلیونه ډالر ځانګړي کړي څو د کونړ او ننګرهار زلزله ځپلو لپاره د مرستو بهیر پیل شي. د ملګرو ملتونو د سرمنشي ویاند، سټيفان دوجارېک ویلي، د ملګرو ملتونو د کډوالو ادارې د ۴.۵ میلیونه ډالرو په ارزښت بیړني توکي کونړ او جلال اباد ته لېږدولي دي چې پکې خیمې، کمپلې، د اوبو لوښي، ګازي دېګونه، سولر څراغونه او ترپالونه شامل دي، تر څو ۵۶۰۰ کورنیو سره مرسته وشي. د کډوالۍ اداره وايي په افغانستان کې یې زېرمې کمې شوي، ځکه له یو څه مودې راهیسې یې هغو افغانانو ته هم مرستې رسولي چې له ګاونډیو هېوادونو، په ځانګړي ډول له پاکستان او ایران راستول شوې وې.