مولوي عبدالکبیر؛ د بریټانیا له ځانګړي استازي سره کتلي دي

د کډوالو چارو وزارت په یوه خبر پاڼه کې ویلي، چې د دغه وزارت وزیر مولوي عبدالکبیر د افغانستان لپاره د بریټانیا له ځانګړي استازي ریچارد لیندسي سره کتلي دي. په خبر پاڼه کې راغلي، چې په دې کتنه کې د افغانستان لپاره د بریټانیا ځانګړي استازي ریچارد لیندسي د پاکستان او افغانستان تر منځ د اوربند ستاینه وکړه او هیله یې څرګنده کړه، چې کابل او اسلام اباد د دایمي اوربند لپاره په ګډه کار وکړي. دغه راز هغه له اړمنو سره د اسلامي امارت مرستې او د هغوی ستونزو ته پر وخت رسېدنه د حکومت بریا وبلله او یادونه یې وکړه، چې بریټانیا د افغانستان په ختېځ کې له زلزله ځپلو سره د مرستې په موخه څلور میلیونه پونډ ځانګړي کړي، چې د ملګرو ملتونو د ادارو لخوا زیانمنو ته رسول کېږي.