د چين دولت رئيس شي جين پينګ د ډسمبر د ۱۶مې نېټې په ماسپښين په پلازمېنې بېجینګ کې د مکاو ځانګړې اداري سيمې له اجرائيه رئيس څن هاوهوی سره لیدلي او د مکاو د اوسني وضعيت او د ځايي حکومت د کارونو په اړه يې د نوموړي راپور اوريدلی دی.
شي جين پينګ ويلي، اجرائيه رئيس څن هاوهوی له تېر کال راهیسې د مکاو خاصې اداري سيمې د نوي حکومت په مشرۍ زيارونه ايستلي او عملي کارونه يې کړي دي، ملي حاکميت، امنيت او پرمختيايي ګټې يې خوندي کړي، د مکاو د اتمې مقننه اسمبلۍ ټاکنې يې په برياليتوب ترسره کړي، د عامو ادارو اصلاحاتي چارې يې پرمخبېولي، د ګوانګ دونګ – هانګ کانګ – مکاو لوی خلیج سيمې په جوړولو کې يې فعاله ونډه اخيستې او په بېلابېلو کارونو کې يې نوي پرمختګونه کړي دي.
شي جين پينګ زیاته کړې، د چين د کمونېست ګوند د شلمې مرکزي کمېټې څلورمې عمومي غونډې په پنځلسم پنځه کلن پلان کې د هېواد د اقتصادي او ټولنيز پرمختګ ستراتيژي طرحه کړې او پکې يې د “يو هېواد، دوه نظامونه”، “د مکاو خلک مکاو اداره کوي” او د لوړې کچې کورواکۍ پاليسۍ پر تطبیق او د مکاو د تلپاتې سوکالۍ او ثبات پر هڅو ټينګار کړی دی.
شي جين پينګ د مکاو له حکومت څخه غوښتي، چې په فعاله توګه د ملي پنځلسم پنځه کلن پلان سره ځان وصل کړي، اداري چارې اصلاح کړي او اقتصاد ته معتدلانه متنوع پرمختګ ورکړي او اداري موثريت لوړ کړي، څو مکاو د هېواد له پرمختګ سره ښه مدغم شي او لاښه خدمتونه وکړي.
