هرات کې د شنو خونو تولیدات د سبزیجاتو ۹۰ سلنه اړتیا پوره کوي

د هرات د کرنې، اوبو لګولو او مالدارۍ ریاست مسوولینو ویلي، چې دا مهال په دغه ولایت کې له ۴ زرو څخه زیاتې معیاري شنې خونې فعالې دي، چې د کال په بېلابېلو موسمونو کې د بازارونو نږدې ۹۰ سلنه د سبزیجاتو اړتیا پوره کوي. د یاد ریاست د کرنیزو چارو آمر بشیراحمد احمدي ویلي، چې په وروستیو کلونو کې د شنو خونو پراختیا د کورنیو تولیداتو په زیاتوالي، د وارداتو په کمېدو او په بازارونو کې د بیو په ثبات کې مهم رول لوبولی دی. نوموړی زیاتوي، د کرنې ریاست هڅه کوي د تخنیکي روزنو او اړینو ملاتړونو په برابرولو سره د شنو خونو د کرکیلې لا پراختیا ته زمینه برابره کړي. په همدې حال کې، یو شمېر هغه کسان چې له ایران څخه راستانه شوي او د شنو خونو مالکان دي، وایي چې دوی دغه مهارتونه په بهر کې زده کړي او اوس یې په هرات کې معیاري شنې خونې جوړې کړې دي.