پنجشېر؛ تېره میاشت نږدې ۹۰ زره سیلانیانو له طبیعي جاذبو لیدنه کړې

د پنجشېر ولایت ځایي چارواکي وایي، چې د تېرې یوې میاشتې په ترڅ کې له ۹۰ زرو څخه ډېرو کورنیو سیلانیانو او ۱۶ بهرنیو وګړو د دغه ولایت له طبیعي جاذبو، تاریخي سیمو او تفریحي ځایونو څخه لیدنه کړې ده. د پنجشېر د والي ویاند سیف‌الدین لټون رسنیو ته ویلي، په دغه ولایت کې د امن فضا، ارام چاپېریال او ښکلې هوا له امله د سیلانیانو د راتګ کچه د پام وړ زیاته شوې ده. د نوموړي په وینا، پریان ولسوالۍ د پنجشېر له مهمو سیاحتي سیمو څخه شمېرل کېږي، چې په وروستیو ورځو کې یې د ګڼ شمېر کورنیو او بهرنیو لیدونکو کوربتوب کړی دی. بلخوا، د پنجشېر والي حافظ محمد اغا حکیم د سیلانیانو د امنیت د تأمین ډاډ ورکړی او له ټولو لیدونکو یې غوښتي، چې د اسلامي شریعت او د چاپېریال ساتنې اصول مراعت کړي.