متقي او د ناروې ځانګړي استازي د سیاسي اړیکو او سیمه‌ییزو همکاریو پر پراختیا خبرې کړې

د بهرنیو چارو وزیر امیر خان متقي د افغانستان لپاره د ناروې له ځانګړي استازي، بیورن هانسن، سره په لیدنه کې پر سیاسي او سیمه‌ییزو موضوعاتو خبرې کړې دي. د راپورونو له مخې، دواړو لورو د افغانستان او نړیوالې ټولنې ترمنځ د اړیکو د پراختیا او د همکاریو د پیاوړتیا په اړه هم بحث کړی دی. بیورن هانسن ویلي، په افغانستان کې د امنیت، د نشه‌یي توکو پر وړاندې د مبارزې او ځینو نورو برخو کې د پام وړ پرمختګونه شوي او باید له نړیوالې ټولنې سره د اړیکو د عادي کېدو لپاره لا ډېر ګامونه واخیستل شي. بلخوا، امیر خان متقي ټینګار کړی چې په افغانستان کې رامنځته شوی ثبات د همکاریو او پرمختګونو لپاره مناسب فرصت برابر کړی او باید له دغه فرصت څخه د ګډو همکاریو د پراختیا لپاره ګټه واخیستل شي.