د چين دولت رئيس شي جين پينګ د مې د ۱۵مې نېټې په سهار د بېجينګ په جونګنانهای کې د امريکا له ولسمشر ډونالډ ټرمپ سره بیا لیدلي دي.
هغه له چين څخه د ډونالډ ټرمپ سفر تاريخي او ارزښتناک بللی او ويلي يې دي، چې له نوموړي سره یې د چين او امريکا د رغنده ستراتيژيک ثبات د اړيکو ټینګښت موخه ټاکلې، د باثباته اقتصادي او سوداګريزو اړيکو د ساتلو، په بېلا بېلو برخو کې د عملي همکاريو د پراخولو او د يو او بل اندېښنو ته د ځواب ويلو په اړه یې مهمې هوکړې کړي او هم یې په نړيوالو او سيمه ييزو مسايلو کې د خپلمنځي اړيکو او همغږۍ د پياوړتيا په اړه موافقه کړې ده.
نوموړي ويلي، چين ته د ټرمپ سفر د دواړو هېوادونو د متقابل تفاهم او باور د ودې او د دواړو هېوادونو د خلکو د ګټو لپاره مهم اهميت لري.
شي جين پينګ زیاته کړې، د ډونالډ ټرمپ سفر د دې ښکارندويي کوي، چې چين او امريکا د متقابل درناوي پر بنسټ سوله ييز ګډ ژوند ترلاسه کولی او هم د همکاریو د پياوړتيا له لارې پرمختګ او بيا سمسورتيا ته وده ورکولی شي.
ډونالډ ټرمپ چين ته خپل سفر ډېر بريالی او نه هېرېدونکی بللی او په خبره یې، له چيني سیال سره یې يو لړ مهمې موافقې کړي او ډېرې مسئلې يې حل کړې دي او دا یې د دواړو هېوادونو او نړۍ لپاره ډېرې ګټورې بللې دي.
نوموړي ويلي، چې هغه رئيس شي جين پينګ خپل ملګری بولي او ورته ځانګړی درناوی لري او د دواړو هېوادونو ترمنځ يې ډېرې ښې اړيکې جوړې کړې دي.
ټرمپ د امريکا او چين ترمنځ اړيکې ډېرې مهمې يادې کړي او په ټکو يې، دغه اړيکې به نورې هم ښې کېږي او پرمختګ به ومومي.
هغه لېوالتيا ښودلې، چې له چيني سیال سره به صادقانه او ژورې اړيکې وساتي.
ولسمشر ډونالډ ټرمپ د خبرو په پای کې د چين دولت رئیس ته بلنه ورکړې، چې له واشنګټن څخه لیدنه وکړي.
