د چين د دولت رئيس شي جين پينګ په بلنه د امريکا ولسمشر ډونالډ ټرمپ د مې له ديارلسمې نېټې څخه تر پنځلسمې نېټې پورې له چین څخه رسمي ليدنه وکړه. د چین د کمونېست ګوند د مرکزي کمېټې د سياسي بيورو غړي او د بهرنيو چارو وزير وانګ يي د مې په پنځلسمې نېټې د چين او امریکا د مشرانو ترمنځ د ملاقاتو او ګډو نظريو په اړه معلومات وړاندې کړل.
لومړی: د چين او امريکا بېلابېلو ټولنو او نړيوالې ټولنې له چین څخه د امریکا د ولسمشر ټرمپ دغه ليدنې ته ډېره پاملرنه کړې ده، هغوی څنګه د دواړو هېوادونو ترمنځ د دغو ملاقاتو ارزونه کړې؟
د چين د بهرنيو چارو وزير وانګ يي په دې اړه رسنيو ته ويلي چې رئیس شي جين پینګ په دې سفر کې له ولسمشر ټرمپ سره د چين او امريکا ترمنځ د اړيکو او د نړيوالې سولې او پرمختګ په تړاو د سترو موضوعاتو په هکله څرګنده، ژوره، رغنده او ستراتيژيکه تبادله کړې او د دوو لويو هېوادونو ترمنځ د اړيکو د ښو ساتلو د لارو چارو د لټولو لپاره يې هڅې کړې او په دې برخه کې يو لړ ګډو نظريو ته رسېدلي دي. لکه څنګه چې ډېرو خبريالانو اشاره کړې وه، دا يو تاریخي اهميت لرونکی ملاقات و.
دوهم: څنګه د چين او امريکا ترمنځ د رغنده ستراتيژيک ثبات اړيکې پر نوې موخې ښه پوهېږو؟
وانګ يي ویلي، دواړو مشرانو په ملاقاتو کې د چين او امريکا د رغنده ستراتيژيک ثبات په موخه اړيکې د دوه اړخيزو اړيکو د نوې موخې په توګه ټاکلې چې همدا په راتلونکو درېیو کلونو او حتی لا اوږدمهاله موده کې د دواړو هېوادونو ترمنځ د اړيکو لپاره ستراتيژيک لارښود برابر کړی دی او هم د دواړو هېوادونو د خلکو او نړيوالې ټولنې د هرکلي وړ ګرځېدلی دی. د چين په اند دا دې همکاريو پر بنسټ مثبت ثبات وي او د نظريو تبادلې او همکاريو له لارې به د دوه اړخيزو اړيکو انعطاف پذيري لاپياوړې شي. چين او امريکا په نړۍ کې د دوو لويو اقتصادونو په توګه يو له بل څخه نشي جلا کېدای. که دواړه خواوې يو له بل سره همکارۍ وکړي، نو دا به هغوی ته ګټې ورسوي، که يو له بل سره جګړه وکړي، نو خامخا به دواړو خواوو ته زيانونه ورسوي. مقاومت خامخا د دواړو هېوادونو او نړۍ لپاره يو ناورين وي. خو که دواړه هېوادونه همکاري وکړي، نو د دواړو هېوادونو او نړۍ په ګټه ډېرې چارې تر سره کېدای شي.
درېیم: دواړو مشرانو په دې ملاقاتو کې د چين او امريکا په بېلا بېلا برخو کې د بېلا بېلو کچو د تګ راتګ په هکله څه ګډو ګټو ته رسېدلي دي؟
وانګ يي په دې اړه ويلي چې د چين او امريکا ترمنځ اړيکې په نړۍ کې تر ټولو مهمې او پېچلې دوه اړخيزې اړيکې بلل کېږي او د مشرانو ډيپلوماسي د دغو اړيکو ستراتيژیک لارښود دی. ولسمشر ډونالډ ټرمپ د خپل ماموریت له پيل راهيسې له رئيس شي جين پینګ سره دوه ځلې ملاقاتونه وکړل، پنځه ځلې يې تليفونې خبرې وکړې او يو بل ته يې څو ځلې پيغامونه لېږلي چې همدا د دوه اړخيزو اړيکو د ښه والي او پرمختګ لپاره ډېر مهم ستراتيژيک ضمانت برابر کړی او اړیکې يې تر ځينو بدلونونو وروسته لاهم عمومي ثبات لري. د دواړو هېوادونو مشرانو په دې ملاقاتو کې پر دې موافقه کړې چې د ملاقاتو، تليفوني خبرو او يا د پيغامونو د لېږلو له لارې خپلمنځي اړيکې لاټينګې کړي. رئيس شي جين پينګ به د ولسمشر ټرمپ په بلنه د روان کال په مني کې له امريکا څخه رسمي لیدنه وکړي. دواړه خواوې دې د مشرانو ترمنځ د تګ راتګ لپاره بشپړ چمتووالی ونيسي او د لازياتو لاسته راوړنو د ګټلو لپاره به هڅې وکړي.
څلورم: څنګه د دواړو هېوادونو ترمنځ کلتوري تبادلې وهڅول شي؟
وانګ يي اړوندې پوښتنې ته په ځواب کې ويلي، رئيس شي جين پینګ پخوا دې ته اشاره کړې چې خلک د چین او امريکا ترمنځ د راتلونکو اړيکو هيله ده، د ښو اړيکو د ساتلو بنسټ له خلکو سره تړاو لري او په راتلونکې کې ځوانان د دې اړیکو عمده ځواک بلل کېږي او حياتي ځواک به يې د خلکو له تګ راتګ څخه راشي. دواړو مشرانو هم په دې ملاقاتو کې د کلتوري تبادلې پر اهميت ټينګار کړی دی.
وانګ يي هم په دې خبري ناسته کې د تايوان مسئلې، د اقتصادي او سوداګريزو لاسته راوړنو او نړيوالو تودو مسئلو په هکله د دواړو مشرانو ګډې نظريې يادې کړې دي.
