د روسيې ولسمشر ولاډيمير پوتين به د مې له ۱۹مې نېټې څخه تر ۲۰مې نېټې پورې د چين د دولت رئيس شي جين پينګ په بلنې له دغه هېواد څخه ليدنه وکړي.
له ۲۰۱۳م کال راهيسې د دواړو سیالانو ترمنځ تګ راتګ زيات شوی او د لیدنو شمېر يې له ۴۰ څخه اوښتی دی.
رئيس شي جين پينګ له روسيې څخه ۱۱ ځلې رسمي ليدنې کړي او ولسمشر ولاديمير پوتین بیا ۱۳ ځلې له چين څخه رسمي ليدنې کړې دي.
دواړو مشرانو د ۲۰۲۵م کال د ډسمبر په ۳۱مې نېټې يو بل ته د نوي کال د مبارکۍ پيغامونه لېږدولي دي.
شي جين پينګ په خپل پیغام کې ويلي وو، چې هغه به له ولسمشر پوتين سره نږدې تګ راتګ ته دوام ورکړي او په نوې زمانې کې به د دواړو هېوادونو اړيکو ته وده ورکړي.
د چين او روسيې مشرانو د سږکال د فبرورۍ په ۴مې نېټې په انلاين خبرو کې د دواړو هېوادونو د اړيکو د پرمختګ په اړه خبرې کړې وې.
اوسمهال د چين او روسيې ترمنځ اړيکې تر بل هر وخت ښې دي او د دواړو هېوادونو د مشرانو لارښوونه د دغو اړيکو د پرمختګ تر ټولو لوی امتياز او اساسي تضمين بلل کېږي.
شي جين پينګ چې کله د ۲۰۱۳م کال په مارچ کې په لومړي ځل د چين د دولت رئيس په توګه وټاکل شو، نو لومړۍ لیدنه يې له روسیې څخه وکړه او دا د دې ښکارندويي کوي، چې نوموړی د چين او روسيې اړیکو ته په درنه سترګه ګوري.
رئيس شي جين پينګ په ۲۰۱۹م کال کې له روسيې څخه د رسمي ليدنې په ترڅ کې له ولسمشر پوتين سره ولیدل او د دواړو هېوادونو اړيکې يې په نوې زمانې کې هراړخيزو ستراتيژيکو همکاريزو اړيکو ته پورته کړې، چې دا د دواړو هېوادونو ترمنځ د تاريخ لوړې اړيکې بلل کېږي.
د چين او روسيې اړيکې د دواړو مشرانو د لارښوونې په رڼا کې ورځ تر بلې ښې کيږي او د لويو هېوادونو د اړيکو او د ګاونډيو هېوادونو د اړیکو نوې بېلګه ګڼل کېږي.
په تېرو څو کلونو کې د چين او روسيې ترمنځ متقابل سياسي اعتماد پرله پسې ښه شوی او ترمنځ يې تګ راتګ او همکاريز ميکانيزم هم بشپړ شوی دی. تر دې دمه د دواړو هېوادونو ترمنځ د تخنيکي نوښت کلني فعالیتونه، د سپورټي تبادلې کلني فعاليتونه او د کلتوري چارو کلني فعاليتونه په برياليتوب ترسره شوي او په بېلا بېلو برخو کې يې زياتو همکاریو ثابت پرمختګ موندلی دی.
سږکال د چین او روسيې د ستراتيژيکو همکاريزو اړيکو د ټینګېدو ۳۰مه کليزه او د دواړو هېوادونو د ښه ګاونډيتوب او دوستانه همکاريو تړون د لاسليکېدو ۲۵مه کليزه ده او د تعليمي چارو کلني فعاليت د پيلېدو له لومړي کال سره برابر دی.
اوس دواړه هېوادونه، په داسې حال کې چې نړيوال وضعيت کړکېچن او په تزلزل کې روان دی، د اړيکو نوي فرصتونه لري.
چين او روسيه لوی هېوادونه دي او هم د ملګرو ملتونو د امنيت شورا دايمي غړي دي، نو د نړۍ د امنيت او ثبات د ساتلو مسئوليت او هم د نړیوالې حکومتولۍ د بشپړولو مسئولیت ورترغاړې دي، نو ځکه یې ترمنځ د اړيکو ثبات ډېر مهم او اړين بلل کېږي.
نړيوال په تمه دي، چې د چين او روسيې د مشرانو ليدنه به ښې لاسته راوړنې ولري، خلکو ته به ډېرې ګټې ورسوي، د نړۍ سولې او امنيت ته به ثبات ورکړي او د نړیوال پرمختګ او سمسورتيا لپاره به پياوړي ګامونه پورته کړي.
