روان کال په هېواد کې د برېښنا اړوند ګڼې پروژې پلې کېږي

د افغانستان برېښنا شرکت ویلي، چې د برېښنا اړوند یې د ۱۷ پروژو قراردادونه کړي، چې ډېری یې ټاکل شوې د روان کال په ترڅ کې عملي شي. د دغه شرکت مسوولین وایي، دا پروژې به د برېښنا د تولید په برخه کې د ۱۸۲۰ مېګاواټه برېښنا د تولید ظرفیت ولري. د هغوی په وینا، که دغه پروژې په راتلونکو درېیو کلونو کې بشپړې شي، د هېواد د برېښنا ډېره اړتیا به له کورنیو سرچینو لکه اوبو، باد، لمر او ډبرو سکرو څخه پوره شي. د برېښنا شرکت ویاند محمدصادق حق‌پرست ویلي، چې په تېرو کلونو کې د هېواد د برېښنا تولید شاوخوا ۲۵۰ مېګاواټه وه، خو اوس له محدودو امکاناتو سره سره په وروستیو څلورو تر پنځو کلونو کې د ۱۸۲۰ مېګاواټه برېښنا د تولید پر پروژو کار روان دی. برېشنا شرکت همداراز وایي، چې د درې زره مېګاواټه برېښنا د واردولو قرارداد هم شوی او روسیې ژمنه کړې، چې افغانستان ته به د برېښنا د تولید پرمختللي تجهیزات برابر کړي.