د چين سوداګرۍ وزير وانګ ون تاو او د روسيې د اقتصادي پرمختګ وزير ماکسيم ريشيتنيکوف د مې په شلمې نېټې په پلازمېنې بېجينګ کې د رئيس شي جين پينګ او ولسمشر ولاديمير پوتين په حضور کې د سوداګرۍ او څواړخيزم د ملاتړ ګډه اعلاميه لاسليک کړې ده.
په اعلاميه کې ويل شوي، چې دواړه خواوې به د څواړخيزم پر ساتنې، ورخلاصون او برابرې سوداګرۍ ټينګار ولري او ژمنه يې کړې، چې د يو اړخيزو او مجبوري اقداماتو او تجارتي پروټېکشنيزم په مقابل کې به لاسونه يو کوي او د ملي امنيت، چاپېريال ساتنې يا د اقليمي بدلون ضد مبارزې په پلمه له سوداګريزو محدوديتونو سره به مخالفت کوي.
په يادې اعلاميې کې ويل شوي، له درېيمې خوا سره يې اقتصادي او سوداګريز مذاکرات به د بلې خوا پر ضد نه کارول کېږي.
دواړه خواوو پر هغه دريځ بيا ټينګار کړی، چې د سوداګرۍ نړيوال سازمان په مرکزيت او د مقرراتو پر بنسټ به له تبعيض پاک د برابر، پرانيستي، ټولشموله، دوام لرونکي او شفاف څواړخيز سوداګريز سيسټم ملاتړ کوي او د دوه اړخيزو سوداګريزو همکاريو او پانګونو د پياوړتيا لپاره به ګډې هڅې کوي.
دواړو هېوادونو په همدې ورځ « د چين او روسيې د هراړخيزې ستراتيژيکې همغږۍ د پياوړتيا او د ښه ګاونډيتوب د ژورتيا ګډه اعلاميه» او « د نړۍ د څو قطبي کېدو او د نوي ډول نړيوالو اړيکو لپاره د چين او روسيې ګډه اعلاميه)) هم لاسليک کړې دي.
