د روسيې ولسمشر ولادیمير پوتین د مې له ۱۹مې تر ۲۰مې نېټې پورې له چين څخه رسمي ليدنه وکړه او له چيني سيال سره يې پر يو لړ مهمو موضوعاتو خبرې وکړې او د خپلمنځي هراړخيزې همغږۍ د ستراتېژيک مشارکت د پرمخبيولو په اړه ورسره نويو ګډو نظرونو ته رسېدلی دی.
چين ته د ولاديمیر پوتین سفر څه کم ۲۴ ساعته و، خو په دغه لنډ تنګ وخت کې د دواړو هېوادونو مشرانو د کوچنۍ او لويې پيمانې لیدنې او درې ساعته مخامخ خبرې کړې دي.
دواړو مشرانو له لیدنې او خبرو وروسته خبري رسنيو ته مالومات ورکړل او وروسته یې د چين او روسيې د تعليمي کال د فعالیت پرانيستونکو مراسمو کې ګډون وکړ او يو ځای یې چای وڅښه.
د پوتين د سفر پرمهال ياد بوخت ترتيبات د دواړو هېوادونو د اړيکو د لوړې سويې او ځانګړتيا ښکارندويي کوي.
چين او روسیې د خپلمنځي هراړخيزې ستراتېژيکې همغږۍ، د ښه ګاونډيتوب او دوستانه همکاريو د پياوړتيا او د نړۍ د څو قطبي کېدو او د نوي ډول نړيوالو اړيکو په اړه دوه مهمې ګډې اعلاميې خپرې کړې دي.
دواړو مشرانو د دوه اړخیزو اړيکو د راتلونکې ودې او همکاريو لپاره عمومي پلان جوړ کړی او هم یې د نړۍ د حکومتولۍ په اړه رغنده نظرونه وړاندې کړي دي.
د چين ټولنيزو علومو اکاډمۍ د روسيې، ختیځې اروپا او منځنۍ اسيا انسټيټيوټ مشر سوګوانګجي يادې ګډې اعلاميې د چين او روسيې د مشرانو ترمنځ د اوسنۍ ليدنې تر ټولو مهمه لاسته راوړنه بللې ده.
سږکال د چين او روسيې ترمنځ د همغږۍ د ستراتېژيک مشارکت د جوړېدو ۳۰مه او د ښه ګاونډيتوب او دوستانه همکاريو تړون د لاسليک ۲۵مه کليزه ده.
د چين او روسیې د دغه تړون د تمدید هوکړه کړې او د دوه اړخیزو اړيکو د لالوړې سويې او باکیفیته ودې لپاره یې د متقابل باور بنسټ ټينګ کړی دی.
د چين د دولتي شورا د پرمختګ څېړنيز مرکز د اروپا او اسيا د ټولنيز پرمختګ څېړونکی لي يونګ چوان رسنيو ته ويلي، چين او روسيې د ښه ګاونډيتوب او دوستانه همکاريو تړون په ۲۰۰۱م کال لاسلیک کړ او وروسته يې په ۲۰۲۱م کال تمدید کړ او اوس يې يو ځل بيا غځولی دی.
دغه تړون د چين او روسیې د اوږدمهاله ښه ګاونډيتوب او هراړخيزې ستراتېژيکې همغږۍ لپاره حقوقي او سیسټمي بنسټ جوړ کړی او له لاسليک وروسته يې اړيکو پرله پسې چټک پرمختګ موندلی دی.
چين سږ کال د اقتصادي او ټولنيز پرمختګ ۱۵م پنځه کلن پلان پیل کړی او روسيه هم د پرمختيا کليدي پړاو ته داخله شوې ده او په ورته وخت کې د دواړو هېوادونو ترمنځ اړيکې باکیفیته پړاو ته داخلې شوي او د نوي ډول اړيکو نوې پيلامه يې پیل کړې ده.
له پوتین سره په دغه سفر کې د روسيې پنځه مرستيال صدراعظمان او اته وزيران هم مل وو او دغه راز په پلاوي کې يې د دغه هېواد د نفتو، اټومي انرژۍ او هوايي چلند د پیاوړو تصديو لوړپوړې چارواکي هم شامل وو.
مالومات ښيي، چين او روسیې د اقتصاد او سوداګرۍ، تعليم، ساينس او ټکنالوژۍ په برخو کې د ۲۰ همکاريو سندونه او دغه راز په څو نورو برخو کې يې هم د ۲۰ همکاريو سندونه لاسليک کړي دي.
څېړونکی سون جوانګجي پر دې اند دی، چې د چين او روسيې ترمنځ په دوديزو برخو کې همکارۍ نسبتاً ډېرې لوړې سويې ته رسېدلي او د سوداګرۍ جوړښت او د همکاريزو لارو چارو په برخو کې د ښه والي امکانات هم لري.
دواړو خواوو په ځينو نويو برخو او هم د نوي کيفيت توليدي ځواک په برخو کې د همکاريو اوږمهاله پلان جوړ کړی او په مصنوعي ځيرکتيا، ساينسي او ټکنالوژيکي نوښت، الکترونيکي سوداګرۍ او ډيجيټل اقتصاد په برخو کې يې همکارۍ هم ډېر پراخ امکانات لري.
د دواړو هېوادونو مشرانو د منځني ختيځ د وضعيت او نورو مهمو نړيوالو او سيمه ييزو موضوعاتو په اړه هم د نظريو تبادلې کړې دي.
دواړو مشرانو هوکړه کړې، چې چين او روسیه به د پيچلي نړيوال وضعيت پر وړاندې په نړيوال ډګر کې خپلمنځي همغږۍ نږدې وساتي او په څو اړخيزو پلېټ فورمونو کې به همغږۍ او همکارۍ لاتقويه کړي.
دوی روښانه پيغام ورکړی، چې د لالوړ کيفيت لرونکې هراړخیزې او ستراتېژيکې همغږۍ له لارې به د چين او روسیې پرمختيا او سمسورتيا وهڅوي او د نړۍ د حکومتولۍ د لاعادلانه او معقول سيسټم د جوړولو لپاره به ګډ کار وکړي.
څېړونکی لي يونګ چوان وايي، د چين او روسيې ستراتېژيکې همکارۍ به متزلزلې نړۍ او په تېره بيا د نړۍ څو قطبي کېدو ته ثابت عوامل برابر کړي او په خبره یې، د رئیس شي جين پينګ د نړيوال پرمختګ، امنيت، تمدن او حکومتولۍ ابتکاري نوښتونه په حقیقت کې د څو قطبي نړيوال نظم د جوړېدو لپاره د چين د پلان او اصولو ښکارندويي کوي. که چين او روسيه په دې برخه کې خپلمنځي ستراتېژيکې همکارۍ پياوړې کړي، نو دا به پر راتلونکي نړيوال نظم ډېر لوی اغېز ولري.
چين ته د پوتين اوسني سفر يو ځل بيا دا ښکاره کړې، چې په نوي عصر کې د دواړو هېوادونو د هراړخيزې همغږۍ ستراتېژيک مشارکت ډېر پياوړی داخلي خوځنده ځواک او پايښت لري او ګډوډې او پيچلې نړۍ ته ثابته او مثبته انرژي ورکوي.
په يوې اونۍ کې د امریکا او روسيې ولسمشرانو له چين څخه رسمي ليدنې وکړې او راتلونکې اونۍ کې به د سربيا ولسمشر په رسمي سفر چين ته ولاړ شي. دا د دې ښکارندويي کوي، چې دوی د چين پر پرمختيايي فرصتونو او اغېزو باور لري.
له شکه پرته، چين د سوله يیز پرمختګ لاره غوره کړې او نړۍ ته يې پر له پسې باور او ځواک ورکړی دی.
