د چين- پاکستان د سياسي ګوندونو فورم او د چين او پاکستان د اقتصادي دهلیز د ګوندي مشورتي ميکانيزم غونډه د مې په ۲۴مې نېټې په پلازمېنې بېجينګ کې د چين د کمونېست ګوند د مرکزي کمېټې د بهرنيو اړيکو څانګې په کوربتوب ترسره شوه.
دغه غونډه «په نوې زمانې کې د چين او پاکستان د ګډ برخلیک ټولنې ابادي— ګوندي عمليات» په سرليک ترسره شوه، چې د پاکستان د ۱۲ لویو سياسي ګوندونو مشرانو، د فکري مرکزونو، رسنيو، ټولنيزو ادارو او د چين د وزارتونو، تصديو، رسنيو او کارپوهانو د استازو په شمول کابو ۱۴۰ کسانو پکې ګډون کړی و.
د چين کمونېست ګوند د مرکزي کمېټې د بهرنيو اړيکو څانګې مشر ليو های شينګ غونډې ته په وينا کې ويلي، چې د رئيس شي جين پینګ او د پاکستاني مشرانو د ستراتيژیکو لارښوونو په رڼا کې د چين او پاکستان د هر اړخيزو ستراتيژيکو همکاريو اړيکې پر له پسې ټينګې شوې دي.
نوموړي ويلي، د چین کمونېست ګوند به د پاکستان له بېلا بېلو سياسي ګوندونو سره د دغه فورم په شمول له بېلا بېلو ډګرونو څخه په استفادې د خپلمنځي همکاريو د لا پياوړتيا او د چين او پاکستان د ګډ برخليک ټولنې د ابادۍ لپاره هڅې وکړي.
د پاکستان مرستيال صدراعظم او د بهرنيو چارو وزير محمد اسحاق ډار يادې غونډې ته ويلي، چې هېواد به یې له چین سره د ګوندي تبادلو له لارې د دواړو هېوادونو د مشرانو ګډې نظريې پلې کړي، متقابل ستراتيژيک او سیاسي باور به ورسره لا ټينګ او خپلمنځي همکارۍ او کلتوري تبادلې به ورسره لا پياوړې کړي او د چین او پاکستان د اقتصادي دهليز د پرمختګ او د دوه اړخيزو اړيکو د لازياتو لاسته راوړنو لپاره به ورسره ګډې هڅې وکړي.
